പ്രമുഖ ബോളിവുഡ് താരം ഋഷി കപൂര്‍ അന്തരിച്ചു
ബോളിവുഡിലെ എക്കാലത്തെയും മികച്ച നടന്മാരില്‍ ഒരാളായ ഋഷി കപൂര്‍ അന്തരിച്ചു. രണ്ട് വര്‍ഷത്തിലേറെയായി അര്‍ബുദ ചികിത്സയിലായിരുന്നു. ഇന്ന് രാവിലെ ശ്വാസതടസ്സത്തെത്തുടര്‍ന്നാണ് അറുപത്തിയേഴുകാരനായ അദ്ദേഹത്തെ മുംബൈയിലെ എച്ച്.എന്‍ റിലയന്‍സ് ഫൗണ്ടേഷന്‍ ആശുപത്രിയില്‍ പ്രവേശിപ്പിച്ചത്.
അര്‍ബുദ ബാധിതനായതിനെ തുടര്‍ന്ന് ഒരു വര്‍ഷത്തോളം അമേരിക്കയില്‍ ചികിത്സയിലായിരുന്നു. തുടര്‍ നാട്ടില്‍ മടങ്ങിയെത്തിയ താരത്തെ ശ്വസന സംബന്ധമായ ബുദ്ധിമുട്ടുകള്‍ അനുഭവപ്പെട്ടതോടെയാണ് ഇന്നലെ വീണ്ടും ആശുപത്രിയിലേക്ക് മാറ്റിയത്. മരണ സമയത്ത് ഭാര്യ നീതു കപൂര്‍ ഒപ്പമുണ്ടായിരുന്നു. നിര്യാണത്തില്‍ സിനിമ – രാഷ്ട്രീയ രംഗത്തെ നിരവധി പേര്‍ അനുശോചനവുമായി രംഗത്തെത്തി.
രാജ് കപൂറിന്റെ മകനായ ഋഷി കപൂര്‍, മേരാ നാം ജോക്കറില്‍ ബാലതാരമായാണ് ബോളിവുഡില്‍ അരങ്ങേറുന്നത്. 1973 ല്‍ ബോബി എന്ന സിനിമയിലൂടെ നായകനായി അരങ്ങേറി. തുടര്‍ന്ന് നൂറോളം ചിത്രങ്ങളില്‍ വേഷമിട്ടു. ‘ദി ബോഡി’ എന്ന ചിത്രത്തിലാണ് അവസാനമായി അഭിനയിച്ചത്.
