നടന്‍ വിജയ്‌ക്കെതിരെ ആരോപണവുമായി ബിഗ് ബോസ്സ് താരം മീര മിഥുന്‍ ; പൊങ്കാലയുമായി ആരാധകര്‍
വിവാദങ്ങള്‍ ഉണ്ടാക്കി വാര്‍ത്തകളില്‍ നിറഞ്ഞു നില്‍ക്കുകയാണ് ബിഗ്‌ബോസ് താരവും നടിയും മോഡലുമായ മീര മിഥുന്‍. തമിഴ് സിനിമയിലെ പ്രമുഖ താരങ്ങള്‍ക്കെതിരെ ആരോപണങ്ങള്‍ ഉന്നയിച്ചു കൊണ്ടായിരുന്നു മീര വാര്‍ത്തകളില്‍ ഇടം നേടിയത്. രജനികാന്ത്, വിജയ്, തൃഷ എന്നിങ്ങനെയുള്ള മുന്‍നിര താരങ്ങള്‍ക്ക് നേരെ അനാവശ്യ വിവാദങ്ങള്‍ പടച്ചു വിടുകയാണ് താരം.
ദിവസങ്ങള്‍ക്ക് മുന്‍പ് നടി തൃഷ തന്നെ അനുകരിക്കുകയാണെന്നും തനിക്ക് വന്ന അവസരങ്ങള്‍ തൃഷ തട്ടിയെടുക്കുകയാണെന്നുംവരെ സൂപ്പര്‍ മോഡലെന്നും പ്രശസ്ത നടിയെന്നും സ്വയം വിശേഷിപ്പിക്കുന്ന മീര ആരോപിച്ചിരുന്നു. ഇപ്പോഴിതാ നടന്‍ വിജയ്‌ക്കെതിരെ വീണ്ടും ഗുരുതര ആരോപണങ്ങശളുമായി രംഗത്തെത്തിയിരിക്കുകയാണ് മീര.
വിജയ് തന്റെ ഫാന്‍സ് ക്ലബ് തലവന് പണം നല്‍കി സോഷ്യല്‍ മീഡിയയില്‍ തനിക്കെതിരെ അശ്ലീല പരാമര്‍ശങ്ങള്‍ നടത്തുകയാണെന്നാണ് വിജയ്‌ക്കെതിരായ മീരയുടെ ആരോപണം. ഇങ്ങനെ തന്നെ മാനസികമായി തളര്‍ത്തി ആത്മഹത്യയിലേക്ക് തള്ളിവിടുകയാണെന്നും മീര ആരോപിക്കുന്നു. ഫാന്‍ക്ലബ് തലവനായ ഇമ്മാനുവലിന് പണം നല്‍കി വിജയ് ട്വിറ്ററിലൂടെ അപമാനിക്കുകയാണ്. അശ്ലീല പരാമര്‍ശങ്ങള്‍ നടത്തുകയാണ്. എന്റെ സ്ത്രീത്വത്തെ അപമാനിച്ചതിലൂടെ എന്നെ മാനികമായി തളര്‍ത്തുകയും ആത്മഹത്യയിലേക്ക് തള്ളി വിട്ടിരിക്കുകയുമാണ്- മീരയുടെ ട്വീറ്റ് ഇങ്ങനെയാണ്.
ദേശീയ വനിതാ കമ്മീഷന്‍, കേന്ദ്രമന്ത്രി സ്മൃതി ഇറാനി, പ്രധാനമന്ത്രി നരേന്ദ്ര മോദി എന്നിവരെ ട്വീറ്റില്‍ ടാഗ് ചെയ്തിട്ടുമുണ്ട്. അതേസമയം മീരയുടെ ട്വീറ്റിന് മറുപടിയായി പൊങ്കാലയും പരിഹാസങ്ങളുമായെത്തിയിരിക്കുകയാണ് വിജയ് ആരാധകര്‍. പ്രശസ്തയാകാന്‍ വേണ്ടിയാണ് മീര ഇത്തരം വില കുറഞ്ഞ പ്രവൃത്തികള്‍ ചെയ്യുന്നതെന്നാണ് ആരാധകര്‍ പറയുന്നത്. നടിക്കെതിരെ നിയമനടപടി സ്വീകരിക്കണമെന്നും ആരാധകര്‍ ആവശ്യപ്പെടുന്നു.
