വാട്‌സ്ആപ്പ് ; ഒരക്കൗണ്ട് ഇനി നാല് ഡിവൈസുകളില്‍ ഉപയോഗിക്കാം
പുതു പുത്തന്‍ ഫീച്ചറുകളുമായി വാട്‌സ് ആപ്പ്. നിലവില്‍ ഒരു സമയം ഒരു ഫോണില്‍ മാത്രമേ വാട്‌സ്ആപ്പ് ഉപയോഗിക്കാന്‍ സാധിക്കുകയുള്ളൂ. എന്നാല്‍ ഇനി മുതല്‍ ഒരു അക്കൗണ്ട് നാല് ഡിവൈസുകളില്‍ വരെ ഉപയോഗിക്കാം എന്ന തരത്തിലാണ് വാട്‌സ് ആപ്പ് പുതുമ കൊണ്ട് വരുന്നത്. വാട്‌സ്ആപ്പില്‍ ഏറ്റവും കൂടുതല്‍ ഉപഭോക്താക്കള്‍ ആവശ്യപ്പെട്ടിട്ടുള്ള ഒരു സൗകര്യം കൂടുതല്‍ ഡിവൈസുകളില്‍ ഒരേസമയം ഉപയോഗിക്കാന്‍ കഴിയുക എന്നതാണ്.
വാട്‌സ്ആപ്പിനെ പ്രവര്‍ത്തനങ്ങളെ വീക്ഷിക്കുന്ന വെബ്‌സൈറ്റായ WABetainfoയാണ് ഇക്കാര്യം അറിയിച്ചിരിക്കുന്നത്. വാട്‌സ്ആപ്പ് ഒരേ സമയം നാല് ഡിവൈസുകളില്‍ വര്‍ക്ക് ചെയ്യാനുള്ള ടെസ്റ്റുകള്‍ നടത്തിക്കൊണ്ടിരിക്കുകയാണ്. എന്നാല്‍ ഞായറാഴ്ച വെബ്‌സൈറ്റ് പുറത്തുവിട്ട റിപ്പോര്‍ട്ടുകള്‍ പ്രകാരം രണ്ടാമതായി ഒരു ഡിവൈസില്‍ വാട്‌സ്ആപ്പ് ഉപയോഗിക്കണമെങ്കില്‍ ചാറ്റ് ഹിസ്റ്ററി മുഴുവനായി പുതിയ ഫോണിലേക്ക് ആഡ് ചെയ്യേണ്ടതായി വരും.
ഇതിനായി ഒരു വൈഫൈ കണക്ഷന്‍ നിര്‍ബന്ധമാണ്, അല്ലാത്തപക്ഷം ഒരു വലിയ ഡേറ്റാ പ്ലാന്‍ തന്നെ ഇതിനായി ചിലവാക്കേണ്ടി വരുമെന്നും റിപ്പോര്‍ട്ടില്‍ ചൂണ്ടിക്കാട്ടുന്നു. ആന്‍ഡ്രോയ്ഡ് പ്ലാറ്റ്‌ഫോമിനെയും ഐഓഎസ് പ്ലാറ്റ്‌ഫോമിനെയും ബന്ധിപ്പിക്കാനുള്ള ശ്രമത്തിലാണ് വാട്‌സ്ആപ്പ്. അതുമൂലം സുരക്ഷിതമായ വാട്‌സപ്പിലെ ചാറ്റ് ഹിസ്റ്ററി രണ്ടാമത്തെ ഡിവൈസിലേക്ക് മാറ്റാനും ഒരു അക്കൗണ്ട് രണ്ടു ഡിവൈസുകളില്‍ ഉപയോഗിക്കാനും സാധിക്കും.
അതുപോലെ തന്നെ വരുന്ന എല്ലാ മെസേജുകളും, കണക്ട് ചെയ്തിട്ടുള്ള എല്ലാ ഡിവൈസുകളിലേക്കും ഒരുപോലെ ലഭിക്കും. ഏതെങ്കിലും സാഹചര്യത്തില്‍ ഒരു ഡിവൈസില്‍ നിന്ന് വാട്‌സ്ആപ്പ് ഒഴിവാക്കുകയാണെങ്കില്‍, നിങ്ങളുടെ സുരക്ഷയ്ക്ക് സഹായിക്കുന്ന എന്‍ക്രിപ്ഷന്‍ കീ മാറുകയും ചെയ്യുമെന്ന്ന്ന് റിപ്പോര്‍ട്ടുകള്‍ സൂചിപ്പിക്കുന്നു. ഇങ്ങനെ എന്‍ക്രിപ്ഷന്‍ കീ മാറുമ്പോള്‍ നിങ്ങള്‍ ആക്ടീവ് ആയിട്ടുള്ള എല്ലാ ചാറ്റുകളിലേക്കും ഒരു നോട്ടിഫിക്കേഷന്‍ എത്തും.
ഐപാഡിന് വേണ്ടിയുള്ള ഒരു ആപ്ലിക്കേഷന്‍ വികസിപ്പിച്ചു കൊണ്ടിരിക്കുകയാണെന്നും വാട്‌സ്ആപ്പ് അറിയിച്ചിട്ടുണ്ട്. ഈ ഫീച്ചര്‍ പ്രായോഗികമായാല്‍ നിങ്ങളുടെ ഐഫോണിലും ഐപാഡിലും ഒരേ സമയം ഒരേ അക്കൗണ്ട് ഉപയോഗിക്കാം എന്നത് ആപ്പിള്‍ ഉല്‍പ്പന്നങ്ങളുടെ ഇഷ്ടക്കാര്‍ക്ക് സന്തോഷമുണ്ടാക്കുന്ന വാര്‍ത്തയാണ്. കമ്പ്യൂട്ടറില്‍ ഉപയോഗിക്കുന്ന വാട്‌സ്ആപ്പാണ് കമ്പനി ഈ ഫീച്ചര്‍ ടെസ്റ്റ് ചെയ്യാനായി ഉപയോഗിച്ചത്. നിങ്ങളുടെ മൊബൈല്‍ ഫോണില്‍ ഉപയോഗിച്ചു കൊണ്ടിരിക്കുന്ന സമയത്ത് തന്നെ നിങ്ങളുടെ കമ്പ്യൂട്ടറിലും വാട്‌സ്ആപ്പ് ഉപയോഗിക്കുക എന്നതാണ് ഇതിലൂടെ സാധ്യമാകുന്നത്.
എന്നാല്‍, നിങ്ങളുടെ മൊബൈല്‍ ഫോണിന് ഒരു മെയിന്‍ ഡിവൈസ് ആക്കി കൊണ്ട് മാത്രമേ ഇപ്പോള്‍ അത് സാധ്യമാകു, ആ രീതിയില്‍ ഒരേ സമയം നിങ്ങളുടെ കമ്പ്യൂട്ടറിലെ മൊബൈല്‍ ഫോണിലും വാട്‌സ്ആപ്പ് ഉപയോഗിക്കാന്‍ വാട്‌സ്ആപ്പ് വെബിന്റെ സഹായത്തോടെ സാധ്യമാകും.
