ആഡംബര ബൈക്കുകള്‍ മോഷണം നടത്തി ഊരു ചുറ്റുന്ന സംഘം പിടിയില്‍
ആഡംബര ബൈക്കുകള്‍ മോഷ്ടിക്കുന്ന സംഘം പിടിയില്‍. പാലക്കാട് ചിറ്റൂര്‍ സ്വദേശികളായ വിജയ്, സുബിന്‍, തൃശൂര്‍ സ്വദേശി ബിന്റ്റൊ എന്നിവരടങ്ങുന്ന സംഘത്തെയാണ് കാലടി പോലീസ് പിടികൂടിയത്. പ്രായപൂര്‍ത്തിയാവാത്ത രണ്ട് പേര്‍ ഉള്‍പ്പെടെ അഞ്ച് അംഗ സംഘമാണ് പിടിയിലായത്. ഇവര്‍ മോഷ്ടിച്ച അഞ്ച് ബൈക്കുകളും പൊലീസ് പിടച്ചെടുത്തു. പൊലീസിന്റെ വാഹന പരിശോധനക്കിടയിലാണ് രണ്ട് ബൈക്കുകളിലായി അഞ്ച് പേര്‍ വരുന്നത് പൊലീസിന്റെ ശ്രദ്ധയില്‍ പെട്ടത്. ബൈക്കുകള്‍ക്ക് നമ്പര്‍ പ്ലേറ്റില്ലായിരുന്നു.
ബൈക്ക് നിര്‍ത്താന്‍ പൊലീസ് കൈ കാണിച്ചെങ്കിലും പ്രതികള്‍ ബൈക്കുപേക്ഷിച്ച് ഓടി രക്ഷപ്പെടാന്‍ ശ്രമിക്കുകയായിരുന്നു. പിടികൂടി ചോദ്യം ചെയ്തപ്പോഴാണ് ബൈക്ക് മോഷണത്തിന്റെ ചുരളഴിഞ്ഞത്. മോഷ്ടിച്ച ബൈക്കുകളുമായി കൂട്ടത്തിലൊരാളുടെ മലയാറ്റൂരുള്ള കാമുകിയെ കാണാനെത്തിയിരുന്നു സംഘം. സംസ്ഥാനത്തിന്റെ വിവിധ ഭാഗങ്ങളില്‍ നിന്ന് നിരവധി ബൈക്കുകളാണ് ഇവര്‍ മോഷ്ടിച്ചിട്ടുള്ളത്.
വിറ്റുകിട്ടുന്ന പണം ലഹരി വാങ്ങി ഉപയോഗിക്കാനും ആഡംബര ജീവിതത്തിനുമാണ് സംഘം ചെലവിടുന്നത്. ഇതിലെ പ്രായപൂര്‍ത്തിയാകാത്ത ഒരാള്‍ വര്‍ക്ക് ഷാപ്പ് മെക്കാനിക്കാണ്. ലോക്ക് ചെയ്ത് നിര്‍ത്തിയിട്ടിരിക്കുന്ന ബൈക്ക് വിദഗ്ധമായി സ്റ്റാര്‍ട്ട് ചെയ്ത് പുറത്തെത്തിക്കുന്നത് ഇയാളാണ്. തുടര്‍ന്ന് പാലക്കാട് കുറഞ്ഞ വിലയ്ക്ക് വില്‍പന നടത്തുകയുമാണ് ചെയ്യുന്നത്. ഇത് വലിയ ഒരു ശൃംഖലയാണെന്നും കൂടുതല്‍ പേര്‍ ഉടന്‍ പിടിയിലാകുമെന്നും പൊലീസ് അറിയിച്ചു.
