അഫ്ഗാനിസ്ഥാനിലെ യൂണിവേഴ്‌സിറ്റിയില്‍ ഭീകരാക്രമണം; 19 വിദ്യാര്‍ത്ഥികള്‍ കൊല്ലപ്പെട്ടു
അഫ്ഗാനിസ്ഥാനിലെ കാബൂള്‍ യൂണിവേഴ്‌സിറ്റിയില്‍ ഉണ്ടായ ഭീകരാക്രമണത്തില്‍ 19 പേര്‍ മരിച്ചതായും 22 പേര്‍ക്ക് പരിക്കേറ്റതായും റിപ്പോര്‍ട്ട്. മൂന്നു ഭീകരരാണ് ഇന്ന് രാവിലെ 11.30 ഓടെ യൂണിവേഴ്‌സിറ്റി ക്യാമ്പസില്‍ ആക്രമണം നടത്തിയത്. ക്യാമ്പസ് ഗേറ്റിലാണ് ആദ്യം ആക്രമണമുണ്ടായത്. തുടര്‍ന്ന് ക്യാമ്പസിനകത്ത് കടന്ന ഭീകരര്‍ വിദ്യാര്‍ത്ഥികള്‍ക്ക് നേരെ വെടിയുതിര്‍ക്കുകയായിരുന്നു.
പിന്നീട് ഏതാനും വിദ്യാര്‍ത്ഥികളെയും അധ്യാപകരെയും ബന്ധികളാക്കി. തുടര്‍ന്ന് മണിക്കൂറുകള്‍ നീണ്ട ഏറ്റുമുട്ടലിനൊടുവിലാണ് ഇവരെ മോചിപ്പിച്ചത്. ആക്രമണം നടത്തിയവരില്‍ ഒരാള്‍ ചാവേറായി പൊട്ടിത്തെറിക്കുകയും രണ്ട് പേര്‍ ഏറ്റുമുട്ടലില്‍ കൊല്ലപ്പെട്ടതായും സര്‍ക്കാര്‍ വക്താവ് താരിഖ് അരിയാന്‍ പറഞ്ഞു.
