ടെക്‌സസ്‌മെക്‌സിക്കോ അതിര്‍ത്തിയില്‍ 19 മൃതദേഹങ്ങള്‍ കത്തിക്കരിഞ്ഞ നിലയില്‍
പി പി ചെറിയാന്‍
റിയൊഗ്രാന്റി ടെക്‌സസ് – മെക്സിക്കോ അതിര്‍ത്തിയിലുള്ള റിയൊഗ്രാന്റി ടൗണിനു സമീപം കത്തികരിഞ്ഞ 19 മൃതദേഹങ്ങള്‍ കണ്ടെടുത്തതായി റ്റാമിലുപ്‌സ സ്റ്റേറ്റ് പ്രൊസിക്യൂട്ടേഴ്‌സ് ഓഫീസ് ശനിയാഴ്ച അറിയിച്ചു.
രണ്ടു വാഹനങ്ങള്‍ക്കു തീ പിടിച്ചിരിക്കുന്നുവെന്ന് വിവരം ലഭിച്ചതനുസരിച്ചാണ് പൊലീസ് സംഭവസ്ഥലത്തെത്തിയത്. വാഹനത്തിലെ തീ അണച്ചപ്പോള്‍ ഒരു വാഹനത്തില്‍ 4 പേരുടെയും, മറ്റൊന്നില്‍ 15 പേരുടെയും മൃതദേഹങ്ങള്‍ കണ്ടെടുക്കുകയായിരുന്നു. കത്തികൊണ്ടിരുന്ന വാഹനങ്ങളിലുള്ള എല്ലാവര്‍ക്കും വെടിയേറ്റിരുന്നുവെന്നും പൊലീസ് പറഞ്ഞു.
സംഭവ സ്ഥലത്ത് വെടിയുണ്ടകള്‍ ഒന്നും കണ്ടെത്താതിരുന്നതിനാല്‍ മറ്റ് എവിടെയോ വച്ച് കൊലപ്പെടുത്തി വാഹനങ്ങളില്‍ മൃതദേഹങ്ങള്‍ ഇട്ടതിനുശേഷം ഈ പ്രദേശത്തുകൊണ്ടുവന്ന് തീയിട്ടതാകാം എന്നാണ് പൊലീസിന്റെ നിഗമനം. ഗ്വാട്ടിമാലയില്‍ നിന്നുള്ളവരായിരിക്കാം കൊല്ലപ്പെട്ടതെന്നാണ് പ്രാഥമിക വിവരങ്ങള്‍ നല്‍കുന്ന സൂചന.
മയക്കു മരുന്നു വില്‍പന സംഘങ്ങളുടെ കേന്ദ്രമാണു സംഭവം നടന്ന സ്ഥലം. ഈ വര്‍ഷം ജനുവരിയില്‍ മാത്രം കൊല്ലപ്പെട്ടവര്‍ 21 ആയി. അതേ സമയം മെക്സിക്കന് ആര്‍മി ഇതേ സ്ഥലത്ത് പതിനൊന്ന് ക്രിമിനല്‍ അംഗങ്ങളെ വെടിവച്ചു കൊന്നിരുന്നു.
