ഇപ്പോള്‍ 2,000 രൂപ നോട്ടുകള്‍ അച്ചടിക്കുന്നില്ലെന്ന് കേന്ദ്ര സര്‍ക്കാര്‍
രാജ്യത്ത് പുതിയ 2,000 രൂപ നോട്ടുകള്‍ അച്ചടിക്കുന്നില്ലെന്ന് വ്യക്തമാക്കി കേന്ദ്ര സര്‍ക്കാര്‍.2016- ല്‍ നോട്ടുനിരോധനത്തിന് ശേഷം അവതരിപ്പിച്ച കറന്‍സി നോട്ടുകള്‍ ഇപ്പോള്‍ വലിയ രീതിയില്‍ പ്രചാരത്തില്‍ ഇല്ലാത്തത് സംബന്ധിച്ച ചോദ്യത്തിന് മറുപടിയായി ധനകാര്യ സഹമന്ത്രി അനുരാഗ് താക്കൂര്‍ ആണ് ലോക്സഭയില്‍ ഇക്കാര്യം വ്യക്തമാക്കിയത്.
2019 മുതല്‍ 2020-21 ലും 2000 രൂപ നോട്ടുകള്‍ അച്ചടിച്ചിട്ടില്ല. 2,000 രൂപയുടെ കറന്‍സി നോട്ടുകള്‍ വിതരണം ചെയ്യുന്നതും വളരെ കുറവാണ്. ബാങ്കുകളിലും എടിഎമ്മുകളിലും പോലും വിരളമായാണ് ഇപ്പോള്‍ 2,000 രൂപ നോട്ടുകള്‍ ലഭിക്കുന്നത്. ഡിമാന്‍ഡ് അടിസ്ഥാനമാക്കി മാത്രമാണ് കറന്‍സികളുടെ അച്ചടി. ആര്‍ബിഐയുമായി സര്‍ക്കാര്‍ കൂടിയാലോചിച്ചതിന് ശേഷമാണ് നോട്ടുകള്‍ രാജ്യത്ത് അച്ചടിക്കുന്നത്. 2,000 രൂപയുടെ നോട്ടുകളുടെ പ്രചാരത്തില്‍ കുറവുണ്ടായതായി മന്ത്രി അനുരാഗ് താക്കൂര്‍ വ്യക്തമാക്കി. 500, 1000 നോട്ടുകള്‍ നിരോധിച്ചാണ് 2016 ല്‍ സര്‍ക്കാര്‍ 2,000 രൂപ നോട്ടുകള്‍ കൊണ്ടുവന്നത്. എന്നാല്‍ രണ്ടായിരത്തിന്റ നോട്ടുകള്‍ക്ക് വിചാരിച്ച ജനപ്രീതി നേടുവാന്‍ കഴിയാത്തതും ചില്ലറ ക്ഷാമവും നോട്ടിന്റെ ആവശ്യത കുറയ്ക്കുകയായിരുന്നു.
