ന്യൂയോര്‍ക്കില്‍ കൊവിഡ് ആന്റിബോഡിയുമായി ആദ്യ കുഞ്ഞ് ജനിച്ചു
ലോകത്ത് ആദ്യമായി കൊവിഡ് ആന്റിബോഡിയുമായി ഒരു കുഞ്ഞ് ജനിച്ചു. ന്യൂയോര്‍ക്കിലാണ് ഈ ചരിത്ര സംഭവം റിപ്പോര്‍ട്ട് ചെയ്തിരിക്കുന്നത്.ഇത് ആദ്യമായാണ് രക്തത്തില്‍ കൊവിഡ് ആന്റിബോഡിയുമായി കുഞ്ഞ് ജനിക്കുന്നത്. പ്രസവത്തിന് ദിവസങ്ങള്‍ക്കു മുന്‍പ് മാതാവ് കൊവിഡ് വാക്‌സിന്‍ സ്വീകരിച്ചിരുന്നു. ഇതിനു പിന്നാലെയാണ് ജനിച്ചതിനു ശേഷം കുട്ടിയില്‍ കൊവിഡ് ആന്റിബോഡി കണ്ടെത്തിയത്.പ്രസവത്തിന് മൂന്ന് ആഴ്ചക്ക് മുന്‍പാണ് മാതാവ് കൊവിഡ് വാക്‌സിന്റെ ആദ്യ ഡോസ് സ്വീകരിച്ചത്. പ്രസവത്തിനു പിന്നാലെ, ജനിച്ച പെണ്‍കുഞ്ഞിന്റെ രക്തം പരിശോധിക്കുകയും രക്തത്തില്‍ കൊവിഡിനെതിരായ ആന്റിബോഡിയുടെ സാന്നിധ്യം കണ്ടെത്തുകയുമായിരുന്നു. കുഞ്ഞ് ആരോഗ്യവതിയാണെന്ന് ഡോക്ടര്‍മാര്‍ അറിയിച്ചു. എങ്കിലും ഇക്കാര്യത്തില്‍ കൂടുതല്‍ പഠനം വേണ്ടതാണെന്നും ഡോക്ടര്‍മാര്‍ അറിയിച്ചു.
