ഹമാസ് റോക്കറ്റ് ആക്രമണം ; മലയാളി യുവതി ഇസ്രായേലില്‍ കൊല്ലപ്പെട്ടു
ഇസ്രയേലിലെ അഷ്‌ക ലോണില്‍ ഹമാസ് നടത്തിയ റോക്കറ്റ് ആക്രമണത്തില്‍ മലയാളി യുവതി കൊല്ലപെട്ടു. ഇടുക്കി കീഴിത്തോട് സ്വദേശി സൗമ്യ സന്തോഷാണ് കൊല്ലപ്പെട്ടത്. കെയര്‍ ടേക്കറായി ജോലി ചെയ്യുകയായിരുന്നു. ആക്രമണത്തില്‍ ഒരു ഇസ്രായേല്‍ യുവതിയും കൊല്ലപ്പെട്ടതായാണ് വിവരം. വീട്ടുകാരുമായി ഫോണില്‍ വീഡിയോ കോള്‍ വിളിച്ചു അവിടത്തെ സ്ഥിതിഗതികള്‍ പറഞ്ഞ സമയത്താണ് സൗമ്യയുടെ താമസസ്ഥലത്ത് റോക്കറ്റ് വീണത്. അതിനു ശേഷം വീട്ടുകാര്‍ ബന്ധപ്പെടാന്‍ ശ്രമിച്ചു എങ്കിലും കഴിഞ്ഞിരുന്നില്ല. കഴിഞ്ഞ 24 മണിക്കൂറുകള്‍ ഉള്ളി മുന്നൂറിലേറെ റോക്കറ്റുകളാണ് ഹമാസ് തൊടുത്തത് എന്നാണ് റിപ്പോര്‍ട്ടുകള്‍ പറയുന്നത്.
കഞ്ഞിക്കുഴി മുന്‍ പഞ്ചായത്ത് മെമ്പര്‍മാരായ സതീശന്റെയും സാവിത്രിയുടേയും മകളാണ് സൗമ്യ. രണ്ട് വര്‍ഷങ്ങള്‍ക്ക് മുന്‍പാണ് സൗമ്യ അവസാനമായി നാട്ടിലെത്തിയത്. ഒരു മകന്‍ ഉണ്ട്. മകന്‍ കുടുംബത്തോടൊപ്പം നാട്ടിലാണ്. ഷെയ്ഖ് ജറയ്ക്ക് സമീപം ഇസ്രായേല്‍ നടത്തുന്ന കുടിയൊഴിപ്പിക്കലുമായി ബന്ധപ്പെട്ട് കഴിഞ്ഞ ഏതാനും ദിവസങ്ങളായി സംഘര്‍ഷം നിലനില്‍ക്കുകയാണ്.
