രണ്ടാം പിണറായി മന്ത്രിസഭയില്‍ 21 പേര്‍ ; സിപിഎമ്മിന് 12 മന്ത്രിമാര്‍ ; സിപിഐക്ക് 4
രണ്ടാം പിണറായി മന്ത്രിസഭയിലെ മന്ത്രിമാരുടെ പട്ടിക പൂര്‍ത്തിയായി. ആകെ 21 പേരാണ് മന്ത്രി സ്ഥാനത്ത് ഉള്ളത്. ഘടക കക്ഷികളുമായുള്ള ചര്‍ച്ച പൂര്‍ത്തിയായി. സിപിഎമ്മിന് 12 മന്ത്രിമാരും സ്പീക്കര്‍ സ്ഥാനവും സിപിഐയ്ക്ക് 4ഉ മന്ത്രിമാരും ഡപ്യൂട്ടി സ്പീക്കര്‍ സ്ഥാനവും കേരള കോണ്‍ഗ്രസ് എം, എന്‍സിപി, ജെഡിഎസ്- ഓരോ മന്ത്രിമാര്‍. കേരള കോണ്‍ഗ്രസിന് ചീഫ് വിപ്പ് സ്ഥാനം കൂടി ലഭിക്കും. അതുപോലെ ഐഎന്‍എല്ലിനും ജനാധിപത്യ കേരള കോണ്‍ഗ്രസിനും ആദ്യ രണ്ടര വര്‍ഷക്കാലം മന്ത്രിസ്ഥാനം കേരള കോണ്‍ഗ്രസ് ബിക്കും കോണ്‍ഗ്രസ് എസിനും രണ്ടാം ടേമില്‍ മന്ത്രിസ്ഥാനം.
രണ്ടാം പിണറായി മന്ത്രിസഭയില്‍ കെ കെ ശൈലജ ഒഴികെ ബാക്കിയുള്ള സിപിഎം മന്ത്രിമാര്‍ പുതുമുഖങ്ങളായിരിക്കും. രണ്ടാമൂഴം കെ കെ ശൈലയ്ക്ക് മാത്രം നല്‍കിയാല്‍ മതിയെന്നാണ് നിലവിലെ ധാരണ. അന്തിമ തീരുമാനം നാളെയുണ്ടാകും. കെ രാധാകൃഷ്ണന്‍, വി ശിവന്‍കുട്ടി, വീണ ജോര്‍ജ്, കെ എന്‍ ബാലഗോപാല്‍, പി രാജീവ് എന്നിവര്‍ മന്ത്രിമാരാകും. എം ബി രാജേഷിനെയും മന്ത്രിസ്ഥാനത്ത് പരിഗണിക്കുന്നുണ്ട്. പി എ മുഹമ്മദ് റിയാസും പരിഗണനയിലുണ്ട്. കോഴിക്കോട് നിന്ന് റിയാസ് അല്ലെങ്കില്‍ കാനത്തില്‍ ജമീല മന്ത്രിയാകും. കോട്ടയത്ത് നിന്ന് വി എന്‍ വാസവനും ആലപ്പുഴയില്‍ നിന്ന് സജി ചെറിയാനോ പി പി ചിത്തരഞ്ജനോ മന്ത്രിയാകും. മലപ്പുറത്ത് നിന്ന് പി നന്ദകുമാറോ വി അബ്ദുറഹ്മാനോ മന്ത്രിയാകും.
ഒരു മന്ത്രിസ്ഥാനവും ഒരു ചീഫ് വിപ്പുമാണ് ജോസ് കെ മാണിയുടെ കേരള കോണ്‍ഗ്രസിന് ലഭിച്ചത്. രണ്ട് മന്ത്രി സ്ഥാനം ആവശ്യപ്പെട്ടിരുന്നു. എന്നാല്‍ പരിമിതികളുണ്ടെന്ന് സിപിഎം അറിയിച്ചെന്ന് ജോസ് കെ മാണി പ്രതികരിച്ചു. റോഷി അഗസ്റ്റിന്‍ മന്ത്രിയാകാനാണ് സാധ്യത. എന്‍ ജയരാജ് ചീഫ് വിപ്പാകും. ജെഡിഎസ് മന്ത്രിയായി കെ കൃഷ്ണന്‍കുട്ടിയെ തീരുമാനിച്ചു. എന്‍സ്പിയില്‍ മന്ത്രി സ്ഥാനം പങ്കിടാന്‍ ധാരണ. എ കെ ശശീന്ദ്രനും തോമസ് കെ തോമസും മന്ത്രിസ്ഥാനം പങ്കിടും. സിപിഐയും സിപിഎമ്മും മന്ത്രിമാര്‍ ആരെന്ന അന്തിമ തീരുമാനം നാളെയെടുക്കും. ഐഎന്‍എല്‍ നേതാവ് അഹമ്മദ് ദേവര്‍കോവിലും ജനാധിപത്യ കേരള കോണ്‍ഗ്രസ് നേതാവ് ആന്റണി രാജുവും ആദ്യ രണ്ടര വര്‍ഷക്കാലം മന്ത്രിമാരാകും. കേരള കോണ്‍ഗ്രസ് ബി നേതാവ് കെ ബി ഗണേഷ് കുമാറും കോണ്‍ഗ്രസ് എസ് നേതാവ് കടന്നപ്പള്ളി രാമചന്ദ്രനും രണ്ടാം ടേമില്‍ മന്ത്രിമാരാകും.
