പശുക്കടത്താരോപിച്ച് ത്രിപുരയില്‍ മൂന്ന് യുവാക്കളെ തല്ലിക്കൊന്നു
പശുക്കടത്താരോപിച്ച് മൂന്ന് യുവാക്കളെ ആള്‍ക്കൂട്ടം തല്ലിക്കൊന്നു. ത്രിപുരയിലെ ഖോവായ് ജില്ലയില്‍ ഇന്ന് പുലര്‍ച്ചെ 4.30 യോടെയാണ് സംഭവം. സയീദ് ഹുസൈന്‍, ബിലാല്‍ മിയ, സൈഫുല്‍ ഇസ്ലാം എന്നിവരാണ് കൊല്ലപ്പെട്ടത്. മൂവരും സെപഹിജാല ജില്ലയിലെ സോനമുറ സ്വദേശികളാണെന്ന് ഖോവായ് ജില്ലാ പൊലീസ് പറഞ്ഞു. ത്രിപുരയിലെ നാമന്‍ജോയ്പാറ ഗ്രാമത്തില്‍ പുലര്‍ച്ചെ അഞ്ചോളം കന്നുകാലികളുമായി എത്തിയ മിനി ട്രക്ക് പിന്തുടര്‍ന്ന് തടഞ്ഞ അക്രമകാരികള്‍ വണ്ടിയിലുണ്ടായവരെ മാരക ആയുധങ്ങളുമായി അക്രമിക്കുകയായിരുന്നു. ഗുരുതരമായി പരിക്കേറ്റ മൂന്നുപേരെയും സമീപത്തെ ആശുപത്രിയിലും പിന്നീട് അഗര്‍ത്തലയിലുള്ള ഗോവിന്ദ് ഭല്ലഭ് പന്ത് ആശുപത്രിയിലും എത്തിച്ചെങ്കിലും മരിക്കുകയായിരുന്നു.
