മലയാളികള്‍ ഒന്നായി ; മുഹമ്മദിന് ആവശ്യമായ 18 കോടിയും ലഭിച്ചു
ഒരാപത്ത് വരുമ്പോള്‍ ഒറ്റക്കെട്ടാകുന്ന മലയാള സമൂഹം ഇത്തവണയും പതിവ് തെറ്റിച്ചില്ല. കണ്ണൂര്‍ മാട്ടൂലില്‍ അപൂര്‍വ രോഗം ബാധിച്ച മുഹമ്മദിന്റെ ചികിത്സയ്ക്കായി ആവശ്യമായിരുന്ന മുഴുവന്‍ പണവും ലഭിച്ചു. മരുന്നിനുള്ള തുക ലഭിച്ചതായി മാട്ടൂല്‍ പഞ്ചായത്ത് പ്രസിഡന്റ് ഫാരിഷയാണ് അറിയിച്ചത്. 18 കോടി രൂപയാണ് മുഹമ്മദിന് മരുന്നിനായി കണ്ടെത്തേണ്ടിയിരുന്നത്. ഇനി ആ മരുന്ന് വിദേശത്ത് നിന്ന് എത്തിക്കുകയും ഒരു ഡോസ് മുഹമ്മദിന് കുത്തി വയ്ക്കുകയും ചെയ്യുന്നതോടെ മുഹമ്മദ് സാധാരണ ജീവിതത്തിലേക്ക് എത്തും.
പൂര്‍വ ജനിതക രോഗമായ സ്പൈനല്‍ മസ്‌കുലര്‍ അട്രോഫി ബാധിച്ച കണ്ണൂര്‍ മാട്ടൂല്‍ കപ്പാലം സ്വദേശി മുഹമ്മദിന്റെ ജീവിതം ട്വന്റിഫോര്‍ ന്യൂസ് റിപ്പോര്‍ട്ട് ചെയ്തിരുന്നു. മുഹമ്മദിന്റെ സഹോദരി അഫ്രയും ഇതേ രോഗത്താല്‍ ദുരിതമനുഭവിക്കുന്ന കുട്ടിയാണ്.മുഹമ്മദിന് രണ്ട് വയസ് ആകുന്നതിന് മുന്‍പ് സോള്‍ജന്‍സ്മ എന്ന ലോകത്തിലെ വിലകൂടിയ മരുന്ന് ഒരു ഡോസ് കുത്തിവെക്കണമെന്നായിരുന്നു ഡോക്ടര്‍മാര്‍ പറഞ്ഞത്. രോഗം തിരിച്ചറിയാന്‍ വൈകിയതോടെയാണ് മുഹമ്മദിന്റെ സഹോദരി അഫ്ര വീല്‍ചെയറിലായത്. ആ ഗതി മുഹമ്മദിനെങ്കിലും വരാതിരിക്കാന്‍ നിരവധി സുമനസുകളാണ് കൈകോര്‍ത്തത്. ഇതിനായി കഴിഞ്ഞ രണ്ടു ദിവസം സോഷ്യല്‍ മീഡിയ രണ്ടും കല്‍പ്പിച്ചു രംഗത് വരികയായിരുന്നു. കോവിഡ് കാരണം മലയാളികള്‍ ഏറ്റവും ബുദ്ധിമുട്ട് അനുഭവിക്കുന്ന സമയത്തു തന്നെയാണ് കുഞ്ഞിന് വേണ്ടി ഇത്രയും വലിയ തുക മലയാളികള്‍ സംഭാവന ചെയ്തത് എന്നത് മലയാളികളുടെ മനസിലെ നന്മ വീണ്ടും ലോകത്തിനെ അറിയിക്കുന്നു.
