കടകള്‍ എല്ലാ ദിവസവും തുറക്കാന്‍ അനുവദിക്കണം: ആവശ്യവുമായി വ്യാപാരികള്‍ ഹൈക്കോടതിയില്‍
കടകള്‍ എല്ലാ ദിവസവും തുറക്കാന്‍ അനുവദിക്കണമെന്ന് ആവശ്യപ്പെട്ട് വ്യാപാരികള്‍ ഹൈക്കോടതിയില്‍. വ്യാപാരി വ്യവസായി ഏകോപന സമിതിയാണ് ഹര്‍ജി നല്‍കിയത്. ടി പി ആര്‍ കണക്കാക്കിയുള്ള ലോക്ഡൗണ്‍ നിയന്ത്രണങ്ങള്‍ അവസാനിപ്പിക്കണമെന്നാണ് ഹര്‍ജിയിലെ പ്രധാന ആവശ്യം. നിയന്ത്രണങ്ങള്‍ പുനഃപരിശോധിക്കാന്‍ സര്‍ക്കാരിന് നിര്‍ദേശം നല്‍കണമെന്നും മാനദണ്ഡങ്ങള്‍ പാലിച്ച് എല്ലാ ദിവസവും കടകള്‍ തുറക്കാന്‍ അനുവദിക്കണമെന്നും ഹര്‍ജിയില്‍ ആവശ്യപ്പെടുന്നു. സംസ്ഥാനത്തെ ലോക്ക്ഡൗണ്‍ രീതികള്‍ അശാസ്ത്രിയമാണെന്നും വ്യാപാരികള്‍ ചൂണ്ടിക്കാട്ടി. രണ്ട് പ്രളയങ്ങളും കോവിഡും പ്രതിസന്ധിയിലാക്കിയ വ്യാപാരികള്‍ക്കായി അതിജീവനത്തിനായി പാക്കേജ് പ്രഖ്യാപിക്കണമെന്നും അവര്‍ ഹര്‍ജിയില്‍ ആവശ്യപ്പെടുന്നുണ്ട്.
വ്യാപാര സ്ഥാപനങ്ങള്‍ അടച്ചിടുന്നതിന് പകരം രോഗബാധിതരെയും അവരുമായി സമ്പര്‍ക്കമുള്ളവരെയും കണ്ടെത്തി ഐസൊലേഷനില്‍ പ്രവേശിപ്പിക്കുകയാണ് ചെയ്യേണ്ടത്. വ്യാപാരികള്‍ ആത്മഹത്യയുടെ വക്കിലാണ് ലോക്ക്ഡൗണ്‍ നിയന്ത്രണങ്ങളില്‍ മാറ്റം വരുത്തേണ്ടത് അത്യാവശ്യമാണെന്നും വ്യാപാരികള്‍ വ്യക്തമാക്കി. ടാക്സ് ഇളവും കട വാടക നികുതിയും ഒഴിവാക്കണം, കെഎസ്ഇബി കുടിശ്ശിക ഇളവ് ചെയ്യണം, ലോണുകള്‍ക്ക് പലിശ രഹിത മൊറട്ടോറിയം പ്രഖ്യാപിക്കുന്നതിനായി നിര്‍ദ്ദേശം നല്‍കാനായി ബാങ്കേഴ്സ് സമിതിയുടെ യോഗം വിളിക്കണം, സ്റ്റോക്ക് നശിക്കുന്നതടക്കമുള്ള നഷ്ടം സഹിക്കേണ്ടി വന്ന വ്യാപാരികള്‍ക്ക് നഷ്ടപരിഹാരം നല്‍കുകയും ജിഎസ്ടി തിരികെ നല്‍കുകയും ചെയ്യുക അടക്കമുള്ളവ അതിജീവന പാക്കേജിന്റെ ഭാഗമായി പ്രഖ്യാപിക്കാന്‍ സര്‍ക്കാരിനോട് നിര്‍ദ്ദേശിക്കണമെന്ന് ഹര്‍ജിയില്‍ ആവശ്യപ്പെടുന്നു.
കടകള്‍ എല്ലാം തുറന്നു പ്രവര്‍ത്തിക്കാന്‍ വ്യാപാരികള്‍ തീരുമാനിച്ചിരുന്നു. എന്നാല്‍ മുഖ്യമന്ത്രിയുമായി നടത്തിയ ചര്‍ച്ചയ്ക്ക് പിന്നാലെയാണ് വ്യാപാരികള്‍ പെട്ടെന്ന് കടകള്‍ തുറക്കുന്നില്ലെന്ന് തീരുമാനിച്ചിരുന്നത്. എന്നാല്‍ മുഖ്യമന്ത്രി വാക്കുപാലിക്കുന്നില്ലെന്ന് ചൂണ്ടിക്കാട്ടിയാണ് ഇപ്പോള്‍ പ്രതിഷേധവുമായി മുന്നോട്ടുപോകുവാന്‍ ഇവര്‍ തീരുമാനിച്ചിരിക്കുന്നത്. എന്നാല്‍ സര്‍ക്കാര്‍ അനുവദിച്ചില്ലെങ്കിലും ഓഗസ്റ്റ് ഒന്‍പതാം തീയതി മുതല്‍ കടകള്‍ തുറന്ന് പ്രവര്‍ത്തിക്കുമെന്ന് വ്യാപാരി വ്യവസായി ഏകോപന സമിതി നേരത്തെ വ്യക്തമാക്കിയിരുന്നു. അതിന് മുന്നോടിയായി ഓഗസ്റ്റ് 2 മുതല്‍ 6 വരെ സെക്രട്ടറിയേറ്റിന് മുന്നില്‍ പ്രതിഷേധം നടത്തുമെന്നും വ്യാപാരികള്‍ അറിയിച്ചിട്ടുണ്ട്. അതേസമയം ബുധനാഴ്ച മുതല്‍ എല്ലാ മൊബൈല്‍ ഷോപ്പുകളും തുറന്നു പ്രവര്‍ത്തിപ്പിക്കും എന്നാണ് മൊബൈല്‍ ഷോപ്പ് വ്യാപാര സംഘടന ഇപ്പോള്‍ തീരുമാനം എടുത്തിരിക്കുന്നത്. കടകള്‍ അടച്ചിടുന്നത് കാരണം ജനങ്ങള്‍ ഓണ്‍ലൈന്‍ വഴി കൂടുതലായി മൊബൈല്‍ അനുബന്ധ ഉപകരണങ്ങള്‍ വാങ്ങുന്നു എന്നാണ് ഇവര്‍ ആരോപിക്കുന്നത്.
