അജ്ഞാത രോഗ ഭീഷണിയില്‍ യു.പി ; രണ്ട് ആഴ്ചയ്ക്കിടെ മരിച്ചത് 68 പേര്‍ ; 40 കുട്ടികള്‍
കോവിഡിന് ഇടയില്‍ ഉത്തര്‍പ്രദേശില്‍ ആശങ്ക ഉയര്‍ത്തി വ്യാധി. അജ്ഞാത രോഗം മൂലം രണ്ട് ആഴ്ചയ്ക്കിടെ 68 പേര്‍ മരിച്ചു എന്നാണ് റിപ്പോര്‍ട്ട്. ഇതില്‍ 40 പേര്‍ കുട്ടികള്‍ ആണെന്ന് കണക്കുകള്‍ വ്യക്തമാക്കുന്നു. കഴിഞ്ഞ 24 മണിക്കൂറിനിടെ 12 കുട്ടികള്‍ മരിച്ചതായി റിപ്പോര്‍ട്ട് ഉണ്ട് . അജ്ഞാത രോഗം കൂടുതല്‍ ബാധിക്കുന്നത് കുട്ടികളിലെന്ന് ഉത്തര്‍പ്രദേശ് ആരോഗ്യവകുപ്പ് പറയുന്നു. രോഗാവസ്ഥയുമായി എത്തിയ ചിലരില്‍ ഡെങ്കി പനിക്ക് സമാനമായ ലക്ഷണങ്ങള്‍ കണ്ടെത്തിയതായും റിപ്പോര്‍ട്ട് ഉണ്ട്. എന്താണ് മരണ കാരണം എന്ന് വ്യക്തമാകാത്തതിനെ തുടര്‍ന്ന് ചികിത്സക്കും കഴിയാത്ത സ്ഥിതിയാണ്.
അതേസമയം രാജ്യത്തെ പ്രതിദിന രോഗബാധ 30,941 ആയി കുറഞ്ഞു. ഇതോടെ രാജ്യത്തെ ആകെ രോഗിബാധിതരുടെ എണ്ണം 3,27,68,880 ആയി. സജീവരോഗികളുടെ എണ്ണത്തില്‍ കുറവുണ്ടാകുന്നത് ഇത് തുടര്‍ച്ചയായി ആറാമത്തെ ദിവസമാണെന്ന് കേന്ദ്ര ആരോഗ്യ കുടുംബക്ഷേമ മന്ത്രാലയം അറിയിച്ചു. രാജ്യത്ത് കഴിഞ്ഞ ദിവസം 350 പേര്‍ കൊവിഡ് ബാധിച്ച് മരിച്ചു, ആകെ മരിച്ചവരുടെ എണ്ണം 4,38,560. സജീവ രോഗികളുടെ എണ്ണം നിലവില്‍ 3,70,640 ആണ്. ഇത് ആകെ രോഗബാധിതരുടെ 1.13 ശതമാനമാണ്. ദേശീയ തലത്തില്‍ രോഗമുക്തി നിരക്ക് 97.53 ശതമാനമാണെന്ന് ആരോഗ്യമന്ത്രാലയം അറിയിച്ചു.
