മെഗാസ്റ്റാറിന് ജന്മദിനാശംസകള്‍ നേര്‍ന്ന് സിനിമാ ലോകം
മലയാളികളുടെ സ്വന്തം മമ്മുക്കയ്ക്ക് ഇന്ന് 70 വയസ്. സതപ്തി ആഘോഷിക്കുന്ന മമ്മൂട്ടിക്ക് ആശംസകള്‍ അര്‍പ്പിക്കുവാന്‍ മത്സരിക്കുകയാണ് സിനിമാ ലോകവും സോഷ്യല്‍ മീഡിയയും. സൂപ്പര്‍സ്റ്റാറുകള്‍ മുതല്‍ അന്യഭാഷാ താരങ്ങള്‍ വരെ മലയാളത്തിന്റെ താര ചക്രവര്‍ത്തിക്ക് പിറന്നാള്‍ ആശംസയുമായി സോഷ്യല്‍ മീഡിയയില്‍ എത്തിക്കഴിഞ്ഞു. സൂപ്പര്‍ താരങ്ങളായ മോഹന്‍ലാല്‍, സുരേഷ് ഗോപി, ജയറാം, ദിലീപ് എന്നിവര്‍ ഉള്‍പ്പെടെ മമ്മൂട്ടിക്ക് ജന്മദിനാശംസകള്‍ നേര്‍ന്നു. അതില്‍ തന്നെ മോഹന്‍ലാല്‍ നല്‍കിയ ആശംസയാണ് സോഷ്യല്‍ മീഡിയയില്‍ വൈറല്‍ ആയത്.
‘പ്രിയപ്പെട്ട, ഇച്ചാക്കാ, ജന്മദിനാശംസകള്‍. ഈ ദിവസം എനിക്കും ആഘോഷിക്കാനുള്ളതാണ്. കാരണം ഇത് എന്റെയും കൂടി ജ്യേഷ്ഠസഹോദരന്റെ പിറന്നാളാണ്. സഹോദര നിര്‍വിശേഷമായ വാത്സല്യം കൊണ്ട്, ജ്യേഷ്ഠ തുല്യമായ കരുതല്‍ കൊണ്ട് ജീവിതത്തിലെയും പ്രൊഫഷണല്‍ ജീവിതത്തിലെയും എല്ലാ ഉയര്‍ച്ച താഴ്ചകളിലും സന്തോഷത്തിലും സങ്കടത്തിലും താങ്ങായി ഒപ്പം നില്‍ക്കുന്ന സാന്നിധ്യമാണ് എനിക്ക് മമ്മുക്ക. അദ്ദേഹത്തിന്റെ ജന്മനാള്‍ ഞാനും എന്റെ കുടുംബവും ഒപ്പം ആഘോഷിക്കുന്നു. ഇതുപോലൊരു പ്രതിഭയ്ക്കൊപ്പം ജീവിക്കാനാവുന്നുവെന്നത് തന്നെ സുകൃതം. അഭിനയത്തില്‍ തന്റേതായ ശൈലി കൊണ്ട് വ്യക്തിമുദ്ര പതിപ്പിച്ച ഇച്ചാക്കക്കൊപ്പം, എന്റെയും പേര് വായിക്കപ്പെടുന്ന എന്നത് ഏറെ സന്തോഷം നല്‍കുന്നു.
നാല് പതിറ്റാണ്ടിനിടെ ഞങ്ങള്‍ ഒന്നിച്ചത് 53 സിനിമകളില്‍. ഒന്നിച്ചു നിര്‍മ്മിച്ചത് അഞ്ചു സിനിമകള്‍. ഇതൊക്കെ വിസ്മയമെന്നേ കരുതാനാവൂ. ലോകത്തൊരു ഭാഷയിലും ഇത്തരമൊരു ചലച്ചിത്ര കൂട്ടായ്മ ഉണ്ടായിക്കാണില്ല. ചെയ്യാനിരിക്കുന്ന വേഷങ്ങള്‍ ചെയ്തവയെക്കാള്‍ മനോഹരം എന്നാണ് ഞാന്‍ കരുതുന്നത്. ഇച്ചാക്കയില്‍ നിന്നും ഇനിയും മലയാള സിനിമയ്ക്കും ഇന്ത്യന്‍ സിനിമയ്ക്ക് തന്നെയും കൂടുതല്‍ നല്ല കഥാപാത്രങ്ങളും മികച്ച സിനിമകളും ലഭിക്കട്ടെ എന്നാശംസിക്കുന്നു. ബഹുമതികളുടെ ആകാശത്തില്‍ ഇനിയുമേറെ ഇടം കിട്ടട്ടെ എന്നും ഇനിയും ഞങ്ങള്‍ക്കൊന്നിക്കാവുന്ന മികച്ച സിനിമകള്‍ ഉണ്ടാവട്ടെ എന്നും പ്രാര്‍ത്ഥിക്കുന്നു. ആയുരാരോഗ്യ സൗഖ്യങ്ങള്‍ നല്‍കി എന്റെ ഈ ജ്യേഷ്ഠസഹോദരനെ ജഗദീശ്വരന്‍ അനുഗ്രഹിക്കട്ടെ എന്നാശംസിച്ചു കൊണ്ട് സ്‌നേഹത്തിന്റെ മധുരം ചാലിച്ച് ഇച്ചാക്കയ്ക്ക് എന്റെ പിറന്നാള്‍ ഉമ്മ.’
പടയോട്ടത്തിലൂടെയാണ് മമ്മൂട്ടി-മോഹന്‍ലാല്‍ കൂട്ടുകെട്ടിന് തുടക്കം. ശേഷം 80-90 കളിലെ പല ചിത്രങ്ങളിലും ഇവര്‍ ഒന്നിച്ചുള്ള ഫ്രയിമുകള്‍ വെള്ളിത്തിരയില്‍ നിറഞ്ഞു. പാവം പൂര്‍ണ്ണിമ, എന്തിനോ പൂക്കുന്ന പൂക്കള്‍, അങ്ങാടിക്കപ്പുറത്ത്, അവിടത്തെപ്പോലെ ഇവിടെയും, നമ്പര്‍ 20 മദ്രാസ് മെയില്‍, വാര്‍ത്ത, ഹരികൃഷ്ണന്‍സ് എന്നിങ്ങനെ ഒരുപറ്റം നല്ല ചിത്രങ്ങളില്‍ ഇവര്‍ ഒന്നിച്ചെത്തി. ഹരികൃഷ്ണന്‍സിനു ശേഷം ഒരു നീണ്ട ഇടവേള ഉണ്ടായി. പിന്നീട് 20-20 എന്ന ചിത്രത്തിലാണ് ഇവര്‍ വീണ്ടും ഒന്നിച്ചത്.
