തുടരുന്ന കര്‍ഷക സമരം ; നാല് സംസ്ഥാനങ്ങള്‍ക്ക് മനുഷ്യാവകാശ കമ്മീഷന്‍ നോട്ടീസ്
നാളുകളായി തുടരുന്ന കര്‍ഷക സമരവുമായി ബന്ധപ്പട്ട് നാല് സംസ്ഥാനങ്ങള്‍ക്ക് ദേശീയ മനുഷ്യാവകാശ കമ്മീഷന്റെ നോട്ടീസ്. ഉത്തര്‍ പ്രദേശ്, ദില്ലി, ഹരിയാന രാജസ്ഥാന്‍ സര്‍ക്കാരുകളോടാണ് റിപ്പോര്‍ട്ട് തേടിയത്. നിലവിലെ സ്ഥിതിവിവരങ്ങള്‍ കമ്മീഷനെ ധരിപ്പിക്കാന്‍ നിര്‍ദ്ദേശമുണ്ട്. സിംഘു, തിക്രി, ഗാസിപ്പൂര്‍ അടക്കം അതിര്‍ത്തികളില്‍ തുടരുന്ന കര്‍ഷക സമരം ജനജീവിതത്തെ ബാധിക്കുന്നുവെന്ന പരാതിയിലാണ് മനുഷ്യാവകാശ കമ്മീഷന്‍ നടപടി. കഴിഞ്ഞ വര്‍ഷം നവംബര്‍ 26 മുതല്‍ ദില്ലി അതിര്‍ത്തികള്‍ ഉപരോധിച്ചാണ് കര്‍ഷകര്‍ സമരം തുടങ്ങിയത്. സിംഘുവില്‍ അടക്കം പ്രധാനപാത ഉപരോധിച്ചുള്ള സമരം ദില്ലിയിലേക്കും പുറത്തേക്കുമുള്ള ഗതാഗതത്തെ ബാധിച്ചെന്നും സമരം നടക്കുന്നതിനാല്‍ കിലോമീറ്ററുകള്‍ ചുറ്റു പോകേണ്ട സാഹചര്യമെന്നും പരാതിക്കാര്‍ പറയുന്നു.
കൂടാതെ സിംഘുവിലെ വ്യവസായ മേഖലയില്‍ പ്രവര്‍ത്തിക്കുന്ന 9000 ചെറുകിട കമ്പനികളെ സമരം ബാധിച്ചുവെന്നും ദേശീയ മനുഷ്യാവകാശ കമ്മീഷന്‍ കണ്ടെത്തി. സമരസ്ഥലങ്ങളില്‍ കൊവിഡ് മാനദണ്ഡങ്ങള്‍ ലംഘിക്കുന്നതായി പരാതി ലഭിച്ചെന്ന് മനുഷ്യാവകാശ കമ്മീഷന്‍ നോട്ടീസില്‍ പരാമര്‍ശിക്കുന്നു. അതേസമയം പ്രശ്‌നപരിഹാരത്തിന് യതൊരും നീക്കവും നടത്താത്ത സര്‍ക്കാരിന്റെ ഇത്തരം നടപടികള്‍ കൊണ്ട് സമരം അവസാനിപ്പിക്കാമെന്ന് കരുതേണ്ടെന്ന് കിസാന്‍ മോര്‍ച്ച നേതാക്കള്‍ പറഞ്ഞു. പ്രാദേശിക പിന്തുണയോടെയാണ് സമരമെന്നും നേതാക്കള്‍ പ്രതികരിച്ചു. അതേസമയം മൂന്നാംഘട്ട സമരത്തിന്റെ ഭാഗമായി നാളെ ജയ്പൂരിലാണ് മഹാപഞ്ചായത്ത് നടത്തുന്നത്.
