പെട്രോളിനും ഡീസലിനും ജിഎസ്ടി ; എതിര്‍പ്പുമായി സംസ്ഥാനങ്ങള്‍
പെട്രോളിനും ഡീസലിനും ജിഎസ്ടി ഏര്‍പ്പെടുത്തുവാനുള്ള നീക്കത്തെ കൂട്ടത്തോടെ എതിര്‍ത്ത് സംസ്ഥാനങ്ങള്‍. ഇന്ന് ചേര്‍ന്ന ജിഎസ്ടി കൗണ്‍സില്‍ യോഗം ഈ വിഷയം ചര്‍ച്ചയ്ക്ക് എടുത്തെങ്കിലും എല്ലാ സംസ്ഥാനങ്ങളും കൂടി ഒന്നിച്ച് എതിര്‍ത്തു. ഇതോടെ വിഷയം പിന്നീട് ചര്‍ച്ച ചെയ്യാനായി മാറ്റിവച്ചു. വിഷയം ചര്‍ച്ച ചെയ്യാനുള്ള സമയമായില്ലെന്ന വിലയിരുത്തലോടെയാണ് നിര്‍ദേശം ചര്‍ച്ച ചെയ്യുന്നത് കൗണ്‍സില്‍ യോഗം നീട്ടിവച്ചത്. പെട്രോളും ഡീസലും ജിഎസ്ടിയില്‍ ഉള്‍പ്പെടുത്താനുള്ള നീക്കത്തെ ശക്തമായി എതിര്‍ക്കുമെന്ന് കേരളവും മഹാരാഷ്ട്രയും അടക്കമുള്ള സംസ്ഥാനങ്ങള്‍ നേരത്തെ വ്യക്തമാക്കിയിരുന്നു. വെളിച്ചെണ്ണയുടെ ജിഎസ്ടി നിരക്ക് ഉയര്‍ത്താനുള്ള നിര്‍ദേശവും വിശദമായ പഠനത്തിനായി മാറ്റിവച്ചു.
കേരളമടക്കമുള്ള സംസ്ഥാനങ്ങള്‍ വെളിച്ചണ്ണയുടെ നിരക്ക് ഉയര്‍ത്തുന്നതിനെതിരെ നിലപാട് എടുത്തിരുന്നു. ഒരു ലിറ്റര്‍ താഴെയുള്ള വെളിച്ചെണ്ണയ്ക്ക് 18 ശതമാനം ജിഎസ്ടി ചുമത്തണം എന്നായിരുന്നു ശുപാര്‍ശ. നിലവില്‍ അഞ്ച് ശതമാനമാണ് വെളിച്ചെണ്ണയുടെ ജിഎസ്ടി. പ്രതിപക്ഷ പാര്‍ട്ടികള്‍ ഭരിക്കുന്ന സംസ്ഥാനങ്ങള്‍ക്കൊപ്പം വിഷയത്തില്‍ പ്രതിഷേധവുമായി ഉത്തര്‍പ്രദേശും കൗണ്‍സില്‍ ചേരുന്നതിന് മുന്‍പ് രംഗത്തെത്തിയിരുന്നു. പെട്രോളും ഡീസലും ജിഎസ്ടിയില്‍ ഉള്‍പ്പെടുത്തുന്നത് സംസ്ഥാനങ്ങള്‍ക്ക് വലിയ വരുമാന നഷ്ടത്തിന് കാരണമാകുമെന്ന് യുപി ധനമന്ത്രി സുരേഷ് ഖന്ന നേരത്തെ പറഞ്ഞിരുന്നു. ജനതാല്‍പ്പര്യത്തിന് വിരുദ്ധമായി നടപടിയായിരിക്കും ഇതെന്നും അദ്ദേഹം പ്രതികരിച്ചിരുന്നു.
പെട്രോളും ഡീസലും ജിഎസ്ടിയില്‍ ഉള്‍പ്പെടുത്തുന്നതില്‍ കേന്ദ്രം അനുകൂലമാണെങ്കിലും പ്രതിഷേധം അവഗണിച്ച് ഏകപക്ഷീയമായ തീരുമാനമുണ്ടാകില്ലെന്നാണ് സൂചന. എന്ത് തീരുമാനമെടുക്കണമെങ്കിലും ജിഎസ്ടി കൗണ്‍സിലിലെ നാലില്‍ മൂന്ന് അംഗങ്ങളുടെ പിന്തുണ വേണമെന്നതാണ് ജിഎസ്ടി ചട്ടം. അതേസമയം രാജ്യത്തെ 77% പേര്‍ക്കും പെട്രോളും ഡീസലും ജിഎസ്ടിയില്‍ ഉള്‍പ്പെടുത്താനാണ് താല്‍പ്പര്യമെന്ന് സര്‍വ്വേ. സാമൂഹിക മാധ്യമ പ്ലാറ്റ്‌ഫോമായ ലോക്കല്‍ സര്‍ക്കിള്‍സ് ആണ് സര്‍വ്വേ നടത്തിയത്. പെട്രോളും ഡീസലും ജിഎസ്ടിയില്‍ ഉള്‍പ്പെടുത്തിയാല്‍ ഒരുപാട് പേരുടെ ജീവിതനിലവാരം ഉയരുമെന്ന് സര്‍വ്വേ പറയുന്നു. ‘ജിഎസ്ടിയില്‍ ഉള്‍പ്പെടുത്തുമ്പോള്‍ പെട്രോള്‍ ലിറ്ററിന് 75 രൂപയും ഡീസല്‍ ലിറ്ററിന് 70 രൂപയായും കുറയും. പക്ഷെ, കേന്ദ്രത്തിനും സംസ്ഥാനത്തിനും വരുമാനത്തില്‍ ഇടിവുണ്ടാകും.’ – സര്‍വ്വേ പറയുന്നു. ഇന്ത്യയിലെ 379 ജില്ലകളില്‍ നിന്നായി 7500 പേരുടെ അഭിപ്രായങ്ങളാണ് സര്‍വ്വേയില്‍ ക്രോഡീകരിച്ചത്. അതില്‍ 61% പുരുഷന്മാരും 39% സ്ത്രീകളുമാണ്.
