സ്റ്റുഡന്റ് പൊലീസ് കേഡറ്റിന്റെ ഫേസ്ബുക്ക് പേജില്‍ ബി.ജെ.പി പോസ്റ്റര്‍
കേരള സ്റ്റുഡന്റ് പൊലീസ് കേഡറ്റിന്റെ ഔദ്യോഗിക ഫേസ്ബുക്ക് പേജില്‍ ആണ് ബി.ജെ.പി പോസ്റ്റര്‍ വന്നത്. സംയുക്ത സേന മേധാവി ബിപിന്‍ റാവത്തിന് ആദരാഞ്ജലികള്‍ അര്‍പ്പിച്ച് കൊണ്ടുള്ള ബി.ജെ.പി കേരള ഘടകത്തിന്റെ പോസ്റ്ററാണ് സ്റ്റുഡന്റ് പൊലീസ് കേഡറ്റ് പേജില്‍ അഡ്മിന്‍സ് ആരോ പോസ്റ്റ് ചെയ്തത്. എന്നാല്‍ വിവാദമായതോടെ പോസ്റ്റര്‍ നീക്കം ചെയ്ത് പുതിയ പോസ്റ്റര്‍ പോസ്റ്റ് ചെയ്തു. പുതിയ പോസ്റ്ററിന് താഴെയും വിമര്‍ശനവുമായി പലരും രംഗത്തെത്തി. ഇതോടെ പോസ്റ്റ് തന്നെ നീക്കം ചെയ്തു. കേരളാ പൊലീസിന് കീഴില്‍ പ്രവര്‍ത്തിക്കുന്ന പേജാണ് സ്റ്റുഡന്റ് പൊലീസ് കേഡറ്റ്.
ഇന്ന് രാവിലെ ബിപിന്‍ റാവത്ത് സഞ്ചരിച്ച ഹെലികോപ്ടര്‍ ഊട്ടിക്ക് അടുത്ത് കൂനൂരില്‍ തകര്‍ന്നു വീഴുകയായിരുന്നു. വ്യോമസേനയുടെ എം.17 ഹെലികോപ്ടറാണ് അപകടത്തില്‍പ്പെട്ടത്. ജനറല്‍ ബിപിന്‍ റാവത്തിനൊപ്പം അദ്ദേഹത്തിന്റെ ഭാര്യ മധുലിക റാവത്തും ഹെലികോപ്റ്ററില്‍ ഉണ്ടായിരുന്നു. ഇതിന് പുറമേ സംയുക്ത സൈനിക മേധാവിയുടെ ഓഫീസ് ജീവനക്കാരും സുരക്ഷാഭടന്‍മാരും അടക്കം ആകെ 14 പേരാണ് ഹെലികോപ്ടറില്‍ ഉണ്ടായിരുന്നത്.
