ദിലീപിനെതിരെ പുതിയ കുരുക്കുകളുമായി കേരളാ പോലീസ് ; സിനിമാ കഥകളെ വെല്ലുന്ന തരത്തില്‍ കേസില്‍ ഇടപെടലുകള്‍
കൊച്ചിയില്‍ നടി ആക്രമിക്കപ്പെട്ട കേസില്‍ പ്രതി സ്ഥാനത്തുള്ള നടന്‍ ദിലീപിന് എതിരെ പുതിയ പുതിയ ആരോപണങ്ങളുമായി കേരളാ പോലീസ്. കോടതിയില്‍ പല വിഷയങ്ങളിലും ദിലീപിന് മുന്‍ തൂക്കം ലഭിക്കുമ്പോള്‍ പുറത്ത് പുതിയ പുതിയ കേസുകള്‍ക്ക് കോപ്പു കൂട്ടുകയാണോ കേരളാ പോലീസ് എന്ന് സംശയിക്കേണ്ടിയിരിക്കുന്നു. ഇതിനെ തുടര്‍ന്ന് നടന്‍ ദിലീപിനെതിരെ പുതിയ കേസ് രജിസ്റ്റര്‍ ചെയ്ത് ക്രൈം ബ്രാഞ്ച്. അന്വേഷണ ഉദ്യോഗസ്ഥരെ അപായപ്പെടുത്താന്‍ പദ്ധതിയിട്ടെന്നാണ് ഇപ്പോള്‍ ചുമത്തിയ കേസ്. എസ് പി കെ സുദര്‍ശന്റെ കൈവെട്ടണമെന്ന ദിലീപിന്റെ പരാമര്‍ശത്തിലാണ് കേസ് രജിസ്റ്റര്‍ ചെയ്തിരിക്കുന്നത്. സംവിധായകന്‍ ബാലചന്ദ്ര കുമാറിന്റെ മൊഴിയുടെ അടിസ്ഥാനത്തിലാണ് കേസ് എടുത്തിരിക്കുന്നത്.
മാധ്യമങ്ങളോട് സംസാരിക്കുന്ന അന്നത്തെ എറണാകുളം റൂറല്‍ എസ് പി എ വി ജോര്‍ജിന്റെ ചിത്രം യൂട്യൂബിലെ വീഡിയോയില്‍ പോസ് ചെയ്ത് നിര്‍ത്തിയ ശേഷം ചിത്രത്തില്‍ തൊട്ട് നിങ്ങള്‍ അഞ്ചു പേര്‍ അനുഭവിക്കാന്‍ പോകുകയാണ്. സോജന്‍, സുദര്‍ശന്‍, സന്ധ്യ, ബൈജു, പിന്നെ നീ എന്ന് പറഞ്ഞു. തന്റെ ദേഹത്ത് കൈവെച്ച സുദര്‍ശന്റെ കൈ വെട്ടണമെന്ന് ദിലീപ് പറഞ്ഞതായും എഫ് ഐ ആറിലുണ്ട്. താന്‍ ഇത് നേരിട്ട് കാണുകയും കേള്‍ക്കുകയും ചെയ്തു. ദിലീപിന്റെ ആലുവയിലെ വീട്ടില്‍ വെച്ചായിരുന്നു ഇതെന്നും ബാലചന്ദ്രകുമാറിന്റെ മൊഴിയില്‍ പറയുന്നു. അന്വേഷണ ഉദ്യോഗസ്ഥനായ ബൈജു പൗലോസാണ് പരാതിക്കാരന്‍.നടിയെ ആക്രമിച്ച കേസില്‍ അന്വേഷണ ഉദ്യോഗസ്ഥരെ അപായപ്പെടുത്താന്‍ ഗൂഢാലോചന നടത്തിയെന്ന മൊഴിയില്‍ ജാമ്യമില്ലാ വകുപ്പ് ചുമത്തിയാണ് ദിലീപിനെതിരെ ക്രൈം ബ്രാഞ്ച് പുതിയ കേസ് രജിസ്റ്റര്‍ ചെയ്തത്. ദിലീപിനെ കൂടാതെ സഹോദരന്‍ അനൂപും സഹോദരി ഭര്‍ത്താവ് സൂരജും അടക്കം ആറ് പ്രതികളാണ് കേസില്‍ ഉള്ളത്.
2017 നവംബര്‍ 15ന് രാത്രി ദിലീപിന്റെ ആലുവയിലെ വീട്ടില്‍ വെച്ച് ഗൂഢാലോചന നടത്തിയെന്ന സംവിധായകന്‍ ബാലചന്ദ്രകുമാറിന്റെ മൊഴിയുടെ അടിസ്ഥാനത്തിലാണ് കേസ്. ദീലീപ്, അനുജന്‍ അനൂപ്, ബന്ധുക്കളായ സൂരജ്, അപ്പു, ദിലീപിന്റെ സുഹൃത്തായ ബൈജു ചെങ്ങമനാട് പിന്നെ ഇനിയും തിരച്ചറിഞ്ഞിട്ടില്ലാത്ത മറ്റൊരാളും പ്രതി പട്ടികയിലുണ്ട്. ഇയാളാണ് ദിലീപിന്റെ വീട്ടില്‍ നടിയെ ആക്രമിക്കുന്ന ദൃശ്യങ്ങള്‍ എത്തിച്ചതെന്നാണ് കരുതുന്നത്. ഗൂഢാലോചന നടത്തിയതിന് തെളിവായി ബാലചന്ദ്രകുമാറിന്റെ കൈവശം ഉണ്ടായിരുന്ന ഓഡിയോ ക്ലിപ്പുകളും അന്വേഷണസംഘം ശേഖരിച്ചിട്ടുണ്ട്.
തിരുവനന്തപുരം ക്രൈംബ്രാഞ്ച് യൂണിറ്റാണ് കേസ് രജിസ്റ്റര്‍ ചെയ്തിരിക്കുന്നത്. പുതിയ കേസില്‍ ദിലീപിനെ ഉടന്‍ ചോദ്യം ചെയ്യും. ക്രൈം ബ്രാഞ്ച് ചുമതല പെടുത്തുന്ന പുതിയ അന്വേഷണ സംഘമായിരിക്കും ഗൂഢാലോചന കേസ് അന്വേഷിക്കുക. വരുന്ന ബുധനാഴ്ച്ച സംവിധായകന്‍ ബാലചന്ദ്രകുമാറിന്റെ രഹസ്യമൊഴി രേഖപ്പെടുത്താനിരിക്കെയാണ് പുതിയ കേസ് രജിസ്റ്റര്‍ ചെയ്യുന്നത്.
