മക്കളെ ഉപേക്ഷിച്ച് കാമുകന്‍മാര്‍ക്കൊപ്പം ഒളിച്ചോടിയ സ്ത്രീകളും കാമുകന്മാരും പിടിയില്‍
മക്കളെ ഉപേക്ഷിച്ചു കാമുകന്മാര്‍ക്ക് ഒപ്പം അടിച്ചു പൊളിക്കാന്‍ പോയ അമ്മമാരും സ്ത്രീകളെ ഇങ്ങനെ വശീകരിച്ചു തട്ടിക്കൊണ്ടു പോകുന്ന കാമുകന്മാരും പിടിയില്‍. പള്ളിക്കല്‍ സ്വദേശികളും ഭര്‍തൃമതികളുമായ രണ്ടു സ്ത്രീകള്‍ ആണ് തങ്ങളുടെ കൊച്ചു കുട്ടികളെ ഉപേക്ഷിച്ചു കാമുകന്‍മാര്‍ക്കൊപ്പം കാറില്‍ കഴിഞ്ഞ ക്രിസ്മസ് പിറ്റേന്ന് രാത്രി നാടുവിട്ടത്. വര്‍ക്കല രഘുനാഥപുരം ബി എസ് മന്‍സില്‍ ഷൈന്‍ (38) എന്ന് വിളിക്കുന്ന ഷാന്‍, കരുനാഗപ്പള്ളി തൊടിയൂര്‍ മുഴങ്ങോട് മീനന്ദേത്തില്‍ വീട്ടില്‍ റിയാസ് (34) എന്നിവരാണ് 2 സ്ത്രീകള്‍ക്കൊപ്പം തമിഴ്‌നാട് കുറ്റാലത്ത് ഉള്ള ഒരു റിസോര്‍ട്ടില്‍ നിന്നും പിടിയിലായത്.
ഒളിച്ചോടിയ ഒരു സ്ത്രീക്ക് ഒന്നര വയസ്സും നാലു വയസ്സും 12 വയസ്സുമുള്ള 3 കുട്ടികളും മറ്റൊരു സ്ത്രീക്ക് അഞ്ചു വയസ്സുള്ള ഒരു കുട്ടിയും ഉണ്ടായിരുന്നു. അമ്മമാര്‍ ഉപേക്ഷിച്ചുപോയ കൊച്ചുകുട്ടികള്‍ അമ്മമാരെ കാണാതെയും ഭക്ഷണം കഴിക്കാതെയും വല്ലാത്ത അവസ്ഥയിലായിരുന്നു. സ്ത്രീകളെ കാണാതായതിനെ തുടര്‍ന്ന് തിരുവനന്തപുരം റൂറല്‍ എസ്പി ഡോക്ടര്‍ ദിവ്യ വി ഗോപിനാഥിന്റെ പ്രത്യേക നിര്‍ദ്ദേശപ്രകാരം ഡിവൈഎസ്പി പി നിയാസിന്റെ മേല്‍നോട്ടത്തില്‍ പള്ളിക്കല്‍ സിഐ പി ശ്രീജിത്ത് എസ് ഐ സഹില്‍ എസ് എസ് പി ഓ രാജീവ് സി പി ഓ ഷമീര്‍ അജീഷ് മഹേഷ് വനിതാ പോലീസ് ഉദ്യോഗസ്ഥരായ അനു മോഹന്‍ ഷംല എന്നിവരുടെ നേതൃത്വത്തില്‍ പ്രത്യേക അന്വേഷണ സംഘം രൂപീകരിക്കുകയായിരുന്നു. പ്രതികളില്‍ ഷൈന്‍ ഏഴുകോണ്‍, ഏനാത്ത് പോലീസ് സ്റ്റേഷനു കളിലും റിയാസിന് ശാസ്താംകോട്ട, കരുനാഗപ്പള്ളി, ചവറ, ശൂരനാട് പോത്തന്‍കോട് എന്നീ സ്റ്റേഷനുകളിലും വിവിധ കേസുകള്‍ നിലവിലുണ്ട്.
പ്രായപൂര്‍ത്തിയാകാത്ത കുട്ടികളെ ഉപേക്ഷിച്ചുപോയ കുറ്റത്തിന് ബാല സംരക്ഷണ നിയമ പ്രകാരം സ്ത്രീകള്‍ക്കെതിരെയും വകുപ്പുകള്‍ ചേര്‍ത്ത് നാലുപേരെയും കോടതിയില്‍ ഹാജരാക്കി റിമാന്‍ഡ് ചെയ്യുമെന്ന് പോലീസ് അറിയിച്ചു. ഭര്‍ത്താക്കന്മാര്‍ നാട്ടില്‍ ഇല്ലാത്ത സമ്പന്നരായ സ്ത്രീകളുടെ ഫോണ്‍ നമ്പര്‍ കണ്ടുപിടിച്ച് ഫോണിലൂടെ സംസാരിച്ചു വശീകരിച്ചു വശത്താക്കി സ്വര്‍ണവും പണവും കൈക്കലാക്കി സ്ത്രീകളോടൊപ്പം വിവിധ സ്ഥലങ്ങളില്‍ കറങ്ങിനടന്നു മുന്തിയ ഹോട്ടലുകളിലും റിസോര്‍ട്ടുകളിലും മറ്റും താമസിച്ചു ആഡംബര ജീവിതം നയിച്ചുവരല്‍ ആയിരുന്നു പ്രതികളുടെ മുഖ്യ തൊഴില്‍. കടത്തിക്കൊണ്ട് പോയ സ്ത്രീകളെ തിരിച്ചു കൊടുക്കുന്നതിന് അവരുടെ ബന്ധുക്കളില്‍ നിന്നും രണ്ടു ലക്ഷം രൂപ വരെ മോചനദ്രവ്യമായി ആയി ഇവര്‍ ആവശ്യപ്പെട്ടിരുന്ന സംഭവവും ഉണ്ട്.
