ഐഫോണ്‍ 6 പ്ലസ് ഉള്ളവര്‍ക്ക് പാര ; ഫോണിനെ കമ്പനി വിന്റേജ് ലിസ്റ്റില്‍ ഉള്‍പ്പെടുത്തി
ഐഫേണ്‍ 6 പ്ലസിനെയാണ് ആപ്പിള്‍ വിന്റേജ് ലിസ്റ്റില്‍ ഉള്‍പ്പെടുത്തിയത്. വിതരണം നിര്‍ത്തി അഞ്ച് വര്‍ഷത്തില്‍ ഏറെയായതും എന്നാല്‍, ഏഴ് വര്‍ഷത്തില്‍ കൂടാത്തതുമായ ഉല്‍പ്പന്നങ്ങളെയാണ് ആപ്പിള്‍ വിന്റേജ് ലിസ്റ്റില്‍ ഉള്‍പ്പെടുത്തുന്നത്.2014ല്‍ പുറത്തിറക്കിയ ഫോണ്‍ ആറ് വര്‍ഷം മുമ്പായിരുന്നു കമ്പനി അവസാനമായി വിതരണം ചെയ്തത്. വിന്റേജ് ഉല്‍പ്പന്നങ്ങള്‍ക്ക് ആപ്പിളില്‍ നിന്ന് ഒരു തരത്തിലുള്ള ഹാര്‍ഡ്വെയര്‍ സര്‍വീസും ലഭിക്കില്ല. അതേസമയം,ഏഴ് വര്‍ഷത്തിലേറെയായി വിതരണം നിര്‍ത്തിയ ഉല്‍പ്പന്നങ്ങളെ കമ്പനി കാലഹരണപ്പെട്ട ലിസ്റ്റിലാണ് ഉള്‍പ്പെടുത്തുന്നത്. ഐഫോണ്‍ 6ന് താഴെയുള്ള ഫോണുകള്‍ നിലവില്‍ ഈ ലിസ്റ്റിലാണ്.
ഐഫോണ്‍ 6, 6എസ് തുടങ്ങിയ ഫോണുകളെ ഇപ്പോഴും കമ്പനി വിന്റേജ് ലിസ്റ്റില്‍ ചേര്‍ത്തിട്ടില്ല. വലിയ ഡിമാന്റ് കാരണം 2017ല്‍ ഐഫോണ്‍ 6 ആപ്പിള്‍ റീലോഞ്ച് ചെയ്തിരുന്നു. 2018 വരെ ആറാമനെ കമ്പനി വിപണിയിലും ലഭ്യമാക്കിയിരുന്നു. വിന്റേജ് ലിസ്റ്റിലേക്ക് പോകാന്‍ ഐഫോണ്‍ 6ന് രണ്ട് വര്‍ഷം കൂടി ബാക്കിയുണ്ട്. കമ്പനി ആദ്യമായി ‘ബിഗ് സൈസ്’ ഫോണ്‍ പരീക്ഷിച്ചത് ഐഫോണ്‍ 6 പ്ലസിലൂടെയായിരുന്നു. 5.5 ഇഞ്ച് വലിപ്പത്തിലിറങ്ങിയ 6 പ്ലസ് ഐഫോണ്‍ ആരാധകര്‍ക്ക് പുതുമയായിരുന്നു. ഇപ്പോള്‍ കയ്യില്‍ ഐഫോണ്‍ 6 പ്ലസ് ഉള്ളവര്‍ എത്രയും വേഗം പുതിയ ഫോണിലേക്ക് മാറുന്നതാകും നല്ലത്.
