പ്രായപൂര്‍ത്തിയാകാത്ത പെണ്‍കുട്ടിയോട് ‘ഐ ലവ് യു’ എന്ന് പറഞ്ഞാല്‍ POCSO കേസില്‍ ഉള്‍പ്പെടില്ല എന്ന് കോടതി
പ്രായപൂര്‍ത്തിയാകാത്ത പെണ്‍കുട്ടിയോട് ‘ഐ ലവ് യു’ എന്ന് പറയുന്നത് ലൈംഗിക പീഡന പരിധിയില്‍ പെടില്ല എന്ന് കോടതി. പെണ്‍കുട്ടിയോട് ഐ ലവ് യു പറഞ്ഞു എന്ന പേരില്‍ പോക്സോ ചുമത്തി പോലീസ് കേസ് രജിസ്റ്റര്‍ ചെയ്ത യുവാവിനെ ലൈംഗിക പീഡനാരോപണ കേസില്‍ നിന്ന് മുംബൈ കോടതി കുറ്റവിമുക്തനാക്കി. ഐ ലവ് യു എന്ന് പറയുന്നത് ‘സ്‌നേഹം എന്ന വികാരം പ്രകടിപ്പിക്കുന്നതിന് തുല്യമാണ്’ എന്ന് നിരീക്ഷിച്ച സ്‌പെഷ്യല്‍ കോടതിയാണ് 22 കാരനായ യുവാവിനെ വെറുതെ വിട്ടത്. പ്രൊട്ടക്ഷന്‍ ഓഫ് ചില്‍ഡ്രന്‍ ഫ്രം സെക്ഷ്വല്‍ ഒഫെന്‍സസ് ആക്ട് (Protection of Children from Sexual Offences Act) അഥവാ പോക്സോ (Pocso) നിയമ പ്രകാരം നിയമിച്ച സ്‌പെഷ്യല്‍ കോടതി, ഇരയുടെ മാന്യതയെ അപമാനിക്കുന്നതിന് തുല്യമായ ഒരു ‘പ്രകടമായ പ്രവൃത്തി’ കുറ്റാരോപിതനെതിരെ പ്രോസിക്യൂഷന് കോടതി മുമ്പാകെ വെളിപ്പെടുത്തിയിട്ടില്ലെന്ന് വ്യക്തമാക്കി.
കൂടാതെ സംഭവം നടന്ന സ്ഥലത്തെക്കുറിച്ചും മറ്റ് വിശദാംശങ്ങളെക്കുറിച്ചും ഇരയായ 17 കാരിയുടെയും അമ്മയുടെയും സാക്ഷിമൊഴികളിലെ വൈരുദ്ധ്യങ്ങളും കോടതി ചൂണ്ടിക്കാട്ടി. ”ഇരയുടെ മൊഴി അനുസരിച്ച് സംഭവ ദിവസം പ്രതി പെണ്‍കുട്ടിയോട് ‘ഐ ലവ് യു’ എന്ന് പറഞ്ഞു. എന്നാല്‍ ഇരയെ പ്രതി ആവര്‍ത്തിച്ച് പിന്തുടരുകയും ‘ഐ ലവ് യു’ പറയുകയും ചെയ്തതായി ഇര പരാതിപ്പെട്ടിട്ടില്ല. ഐ ലവ് യൂ എന്ന് പെണ്‍കുട്ടിയോട് ഒറ്റ തവണ മാത്രം പറഞ്ഞ ഈ സംഭവം ഇരയോടുള്ള പ്രതിയുടെ സ്‌നേഹം പ്രകടിപ്പിക്കുന്നതിന് തുല്യമായിരിക്കാം. അതിനാല്‍ ഇരയുടെ മാന്യതയെ അപമാനിക്കുക എന്ന ഉദ്ദേശത്തോടെയാണ് ഈ പ്രവൃത്തി ചെയ്തതെന്ന് പറയാനാവില്ല. ഇരയുടെ മാന്യതയെ അപമാനിക്കുന്നതിന് തുല്യമായ ഒരു പ്രവൃത്തി കുറ്റാരോപിതന്‍ ചെയ്തതായി കോടതിയ്ക്ക് മുമ്പാകെ തെളിയ്ക്കാന്‍ പ്രോസിക്യൂഷന് സാധിച്ചിട്ടില്ല. പ്രതി ലൈംഗിക ഉദ്ദേശത്തോടെ ഇരയോട് ഏതെങ്കിലും വിധത്തില്‍ പെരുമാറിയിട്ടുണ്ടെന്നതിനും തെളിവ് ലഭിച്ചിട്ടില്ല” സ്‌പെഷ്യല്‍ ജഡ്ജി കല്‍പ്പന പാട്ടീല്‍ ഉത്തരവില്‍ പറഞ്ഞു.
സംഭവം നടന്നതായി പ്രായപൂര്‍ത്തിയാകാത്ത പെണ്‍കുട്ടിയും അമ്മയും പറയുന്ന സ്ഥലങ്ങള്‍ വ്യത്യസ്തമാണെന്നും കോടതി നിരീക്ഷിച്ചു. വീടിന് സമീപത്തെ കുളിമുറിയില്‍ വെച്ചാണ് സംഭവം നടന്നതെന്ന് അമ്മ പറയുമ്പോള്‍ മറ്റൊരു കുളിമുറിയില്‍ പോയതായാണ് പെണ്‍കുട്ടി പറഞ്ഞത്. കൃത്യമായ തെളിവുകള്‍ ലഭ്യമല്ലെന്നും കോടതി ചൂണ്ടിക്കാട്ടി. സംഭവം നടന്ന സ്ഥലം സംബന്ധിച്ച മൊഴികളിലെ വൈരുദ്ധ്യവും പ്രതിയുടെ കൃത്യമായ പ്രവൃത്തിയെക്കുറിച്ചുള്ള തെളിവുകളുടെ അഭാവവും പരിഗണിച്ചാണ് കോടതി പ്രതിയെ വെറുതെ വിട്ടത്. ഇരയുടെ അയല്‍വാസിയായ പ്രതിക്കെതിരെ ഇന്ത്യന്‍ ശിക്ഷാനിയമം 506 (ക്രിമിനല്‍ ഭീഷണിപ്പെടുത്തല്‍), 509 (സ്ത്രീയെ അപമാനിക്കല്‍) എന്നീ വകുപ്പുകളും 2016 ലെ പോക്സോ നിയമത്തിലെ പ്രസക്തമായ വകുപ്പുകളും ചുമത്തിയാണ് കേസെടുത്തിരുന്നത്.
ഇരയുടെ മൊഴിയനുസരിച്ച്, 2016 ഫെബ്രുവരി 7ന്, പെണ്‍കുട്ടി പ്രദേശത്തെ പൊതു കുളിമുറിയിലേയ്ക്ക് പോകവേ പ്രതി പെണ്‍കുട്ടിയെ പിന്തുടരുകയും ഐ ലവ് യൂ എന്ന് പറയുകയുമായിരുന്നു. തുടര്‍ന്ന് പെണ്‍കുട്ടി വീട്ടില്‍ തിരിച്ചെത്തി അമ്മയെ വിവരം അറിയിച്ചു. നേരത്തെയും പ്രതി തന്നെ ശല്യപ്പെടുത്തിയിട്ടുണ്ടെന്നും അയാള്‍ തന്നെ നോക്കി നില്‍ക്കാറുണ്ടായിരുന്നുവെന്നും എന്നാല്‍ താന്‍ അത് അവഗണിക്കുകയായിരുന്നുവെന്നും പെണ്‍കുട്ടി കോടതിയെ അറിയിച്ചു. പ്രതി തന്റെ മകളെ കണ്ണിറുക്കി കാണിച്ചിരുന്നുവെന്നും പ്രതിയുടെ ബന്ധു ഭീഷണിപ്പെടുത്തിയതായും ഇരയുടെ അമ്മ കോടതിയെ അറിയിച്ചു. എന്നാല്‍ ഇര കണ്ണിറുക്കിയത് സംബന്ധിച്ച് കോടതിയില്‍ പരാമര്‍ശിച്ചില്ല.
