സി ബി ഐ അഞ്ചാം ഭാഗത്തില്‍ ജഗതിയും ; ജഗതി വീണ്ടും തിരിച്ചെത്തുന്നു
മലയാളികളുടെ ഇഷ്ട കുറ്റാന്വേഷകന്‍ സേതുരാമയ്യര്‍ വീണ്ടും വരുന്നു എന്ന വാര്‍ത്തകള്‍ വന്നത് മുതല്‍ ഉയര്‍ന്ന ചോദ്യമാണ് സേതുരാമയ്യരുടെ സഹായിയായ വിക്രമായി ജഗതി ശ്രീകുമാറും ചിത്രത്തില്‍ ഉണ്ടാകുമോ എന്നത്. ഈ ചോദ്യങ്ങള്‍ക്കെല്ലാമാണ് ഇപ്പോള്‍ വിരാമമിട്ടിരിക്കുന്നത്. സിനിമയില്‍ ജഗതിയും ഉണ്ട്. സിബിഐ സീരീസുകളില്‍ മമ്മൂട്ടിക്കൊപ്പം എത്തിയ മിടുക്കനായ വിക്രമെന്ന കുറ്റാന്വേഷകന്‍ ഇല്ലാത്ത അഞ്ചാം പതിപ്പിനെ പറ്റി ആലോചിക്കാന്‍ പോലും സാധിക്കില്ലെന്ന് അണിയറ പ്രവര്‍ത്തകര്‍ തീരുമാനിക്കുക ആയിരുന്നു. ഇതോടെയാണ് വാഹനാപകടത്തിന് പിന്നാലെ അഭിനയ രംഗത്തുനിന്നും വിട്ടു നിന്ന ജഗതി വീണ്ടും തിരിച്ചെത്തുന്നത്.
‘സേതുരാമയ്യരായി മമ്മൂട്ടി അഭിനയിക്കുമ്പോള്‍, ചാക്കോ ആയി മുകേഷ് അഭിനയിക്കുമ്പോള്‍, അവരോടൊപ്പം ഞങ്ങളുടെ വിക്രമും എത്തിയിരിക്കുന്നു’, എന്ന് സംവിധായകന്‍ കെ മധു പറഞ്ഞു. മകന്‍ രാജ്കുമാറും ചിത്രത്തില്‍ ജ?ഗതിക്കൊപ്പം ഉണ്ടാകും. ജഗതിയുടെ വീട്ടില്‍ വച്ചാകും അദ്ദേഹത്തിന്റെ രംഗങ്ങള്‍ ഷൂട്ട് ചെയ്യുക. പ്രിയതാരവും സിനിമയില്‍ സിബിഐ 5 ല്‍ ഉണ്ടെന്നറിഞ്ഞതോടെ ഏറെ ആവേശത്തിലാണ് സിനിമാ പ്രേമികളും ആരാധകരും. കഴിഞ്ഞ ദിവസമാണ് സിബിഐ സീരിസിലെ അഞ്ചാമത്തെ ചിത്രത്തിന് പേരിട്ടത്. സിബിഐ 5 ദ ബ്രെയ്ന്‍ എന്നാണ് പേര്.
ഫസ്റ്റ് ലുക്ക് മോഷന്‍ പോസ്റ്ററിനൊപ്പമായിരുന്നു ടൈറ്റിലും റിലീസ് ചെയ്തത്. ആശാ ശരത്താണ് മമ്മൂട്ടിയുടെ നായികയായി എത്തുന്നത്. തിരുവനന്തപുരം, ഹൈദരാബാദ്, ദില്ലി എന്നിവിടങ്ങളും ലൊക്കേഷനുകളാണ്. മുകേഷ്, രണ്‍ജി പണിക്കര്‍, സൗബിന്‍ ഷാഹിര്‍, സായ് കുമാര്‍ എന്നിവര്‍ക്കൊപ്പം ഒട്ടേറെ താരങ്ങള്‍ ചിത്രത്തിന്റെ ഭാഗമാകും. 1988ലാണ് മ്മൂട്ടി- കെ മധു- എസ് എന്‍ സ്വാമി കൂട്ടുകെട്ടില്‍ സിബിഐ സീരിസിലെ ആദ്യ ചിത്രമായ ഒരു സിബിഐ ഡയറികുറിപ്പ് പുറത്തിറങ്ങുന്നത്. പിന്നീട് ജാഗ്രത, സേതുരാമയ്യര്‍ സിബിഐ, നേരറിയാന്‍ സിബിഐ എന്നീ ചിത്രങ്ങളും പുറത്തെത്തി.
