ന്യൂയോര്‍ക്കില്‍ സബ്വേ സ്റ്റേഷനില്‍ വെടിവയ്പ്പ് ; നിരവധി പേര്‍ക്ക് പരുക്ക്
ന്യൂയോര്‍ക്ക് ബ്രൂക്ലിനിലെ സബ്വേ സ്റ്റേഷനില്‍ നടന്ന വെടിവെപ്പില്‍ 13 പേര്‍ക്ക് പരിക്കേറ്റു. ഇതില്‍ അഞ്ചു പേരുടെ നില ഗുരുതരമാണ് എന്നാണ് റിപ്പോര്‍ട്ട്. പകല്‍ സമയമാണ് ആക്രമണം ഉണ്ടായത്. ഏറെ തിരക്കുള്ള സമയത്തു അക്രമി ട്രെയിന്‍ കയറാന്‍ വന്നവരുടെ നേര്‍ക്ക് വെടി ഉതിര്‍ക്കുകയായിരുന്നു. സബ്വേ സ്റ്റേഷന്റെ പ്ലാറ്റ്ഫോമില്‍ രക്തത്തില്‍ കുളിച്ച യാത്രക്കാരുടെ ചിത്രങ്ങള്‍ പുറത്ത് വന്നു. അഞ്ചടി അഞ്ചിഞ്ച് ഉയരമുള്ള പുരുഷനാണ് ജനത്തിന് നേരെ വെടിയുതിര്‍ത്തതെന്ന് സംഭവത്തിന്റെ ദൃക്സാക്ഷികളായ പൊലീസ് ഉദ്യോഗസ്ഥര്‍ പറയുന്നു. വെടിവെപ്പ് തുടങ്ങുന്നതിനു മുന്‍പ് എന്തോ ഗ്യാസ് നിറഞ്ഞ വസ്തു ഇയാള്‍ ജനങ്ങള്‍ക്ക് നേരെ എറിയുകയും ചെയ്തിരുന്നു.
സബ്വേയില്‍ നിന്ന് പുക ഉയരുന്നു എന്നായിരുന്നു ന്യൂയോര്‍ക്ക് പൊലീസിന് ലഭിച്ച സന്ദേശം. അവിടെ എത്തിയപ്പോഴാണ് വെടിയേറ്റ് കിടക്കുന്നവരെ കാണുന്നത്. അന്വേഷണം പുരോഗമിക്കുന്നതിനാല്‍ ബ്രൂക്ലിന്റെ 36-ാം തെരുവും, 4-ാം അവന്യൂ ഏരിയയും ഒഴിവാക്കണമെന്ന് ജനങ്ങളോട് ന്യൂയോര്‍ക്ക് പൊലീസ് പറഞ്ഞു. അക്രമിക്കു വേണ്ടിയുള്ള തിരച്ചില്‍ ഇപ്പോഴും തുടരുകയാണ്.
