ഗൗതം അദാനി ലോകത്തിലെ അഞ്ചാമത്തെ സമ്പന്നന്‍
ലോക സമ്പന്നന്‍മാരില്‍ അഞ്ചാമനായി ഇന്ത്യന്‍ വ്യവസായ പ്രമുഖന്‍ ഗൗതം അദാനി. വാറന്‍ ബഫറ്റിനെ പിന്തള്ളിയാണ് അദാനി ഗ്രൂപ്പ് ചെയര്‍മാന്‍ ഗൗതം അദാനി അഞ്ചാം സ്ഥാനത്തേക്ക് ഉയര്‍ന്നത്. ഫോബ്‌സ് റിപ്പോര്‍ട്ട് അനുസരിച്ച്, 59 കാരനായ അദാനിയുടെ ആസ്തി 123.7 ബില്യണ്‍ യുഎസ് ഡോളറാണ്, ബുഫറ്റിന്റേതാകട്ടെ 121.7 ബില്യണ്‍ യുഎസ് ഡോളറും. ഇന്ത്യയിലെ ഒന്നാമത്തെയും ഏഷ്യയിലെ രണ്ടാമത്തെയും സമ്പന്നനായ ഗൗതം അദാനി 2022-ല്‍ 43 ബില്യണ്‍ ഡോളര്‍ വരുമാനമാണ് നേടിയത്. 269.7 ബില്യണ്‍ ഡോളറുമായി ഇലോണ്‍ മസ്‌ക് ഒന്നാം സ്ഥാനത്തുണ്ട്. 170.2 ബില്യണ്‍ ഡോളര്‍ ആസ്ഥിയുമായി ആമസോണ്‍ മേധാവി ജെഫ് ബെസോസ് രണ്ടാം സ്ഥാനത്തും 167.9 ബില്യണ്‍ ഡോളര്‍ സമ്പാദ്യവുമായി എല്‍എംവിഎച്ച് ഉടമ ബെര്‍ണാഡ് അര്‍നോള്‍ട്ട് മൂന്നാം സ്ഥാനത്തും 130.2 ബില്യണ്‍ ഡോളറുമായി മൈക്രോസോഫ്റ്റ് സഹസ്ഥാപകന്‍ ബില്‍ ഗേറ്റ്സ് നാലാം സ്ഥാനത്തുമുണ്ട്.
104.2 ബില്യണ്‍ യുഎസ് ഡോളറുമായി എട്ടാം സ്ഥാനത്ത് റിലയന്‍സ് ഇന്‍ഡസ്ട്രീസ് ചെയര്‍മാനും എംഡിയുമായ മുകേഷ് അംബാനിയുമുണ്ട്. റിന്യൂവബിള്‍ എനര്‍ജി കമ്പനിയായ അദാനി ഗ്രീന്‍ ലിസ്റ്റ് ചെയ്തതിന് ശേഷം, അദാനിയുടെ സമ്പത്ത് 2020 ലെ 17 ബില്യണ്‍ ഡോളറില്‍ നിന്ന് ഏകദേശം അഞ്ച് മടങ്ങ് വര്‍ദ്ധിച്ച് 81 ബില്യണ്‍ ഡോളറായി. ഇന്ത്യന്‍ സമ്പന്നരുടെ പട്ടികയില്‍ ഒന്നാമതുള്ള അദാനി ബ്ലുംബര്‍ഗ് ബില്യണയേഴ്‌സ് ഇന്‍ഡക്‌സ് പ്രകാരം ലോകത്ത് ഈ വര്‍ഷം ഏറ്റവും കൂടുതല്‍ നേട്ടമുണ്ടാക്കിയ സമ്പന്നരുടെ പട്ടികയില്‍ രണ്ടാമതാണ്. അദാനിയുടെ വരവോടെ ഇപ്പോള്‍ ഇന്ത്യയിലെ ഏറ്റവും വലിയ കോടീശ്വരന്മാരില്‍ രണ്ടാമനാണ് അംബാനി.
