ഭാര്യക്ക് സര്‍ക്കാര്‍ ജോലി കിട്ടി ; അസൂയമൂത്ത ഭര്‍ത്താവ് ഭാര്യയുടെ കൈപ്പത്തി വെട്ടിമാറ്റി
ബംഗാളിലെ ഈസ്റ്റ് ബുര്‍ധ്വാന്‍ ജില്ലയിലെ കേതുഗ്രാമില്‍ തിങ്കളാഴ്ചയാണ് ഞെട്ടിക്കുന്ന സംഭവം അരങ്ങേറിയത്. രേണു ഖാത്തു എന്ന യുവതിയുടെ കൈപ്പകത്തിയാണ് ഭര്‍ത്താവ് ഷേര്‍ മുഹമ്മദ് വെട്ടിമാറ്റിയത്. ആരോഗ്യ വിഭാഗത്തിലെ നഴ്സായാണ് രേണുവിന് ജോലി കിട്ടിയത്. രേണുവിന്റെ കൈപ്പത്തി വെട്ടിമാറ്റിയശേഷം ഭര്‍ത്താവ് ഷേര്‍ മുഹമ്മദ് അവരെ ആശുപത്രിയില്‍ എത്തിച്ചശേഷം മുങ്ങുകയും ചെയ്തു. എന്നാല്‍ വെട്ടിമാറ്റിയ കൈപ്പത്തി ശസ്ത്രക്രിയയിലൂടെ തുന്നിച്ചേര്‍ക്കാന്‍ അവസരം കൊടുക്കാതിരിക്കാനായി കൈപ്പത്തി ആശുപത്രിയില്‍ എത്തിച്ചില്ല.
ജോലിക്കു പോകരുതെന്ന് ഭാര്യയോട് ഷേര്‍ മുഹമ്മദ് പറയാറുണ്ടായിരുന്നു. ഇതു സംബന്ധിച്ച് ഇരുവരും തമ്മില്‍ തര്‍ക്കം ഉണ്ടാവുകയും ചെയ്തിരുന്നു. സര്‍ക്കാര്‍ ജോലി ലഭിച്ച ഭാര്യ തന്നെ വിട്ടുപോകുമെന്ന് ഇയാള്‍ ഭയന്നിരിക്കാമെന്നും നാട്ടുകാര്‍ പറയുന്നു. ജോലിക്കു പോകാന്‍തന്നെയായിരുന്നു രേണുവിന്റെ തീരുമാനം. ഇതിനിടയിലാണ് ഷേര്‍ മുഹമ്മദ് കൈപ്പത്തി വെട്ടിമാറ്റിയത്. ആശുപത്രിയില്‍ അഡ്മിറ്റ് ചെയ്തതിനു പിന്നാലെ ഇയാള്‍ മുങ്ങി. ഇയാളുടെ കുടുംബവും ഒളിവില്‍പ്പോയി. നഴ്സിങ് പഠിച്ചശേഷം സമീപ നഗരമായ ദുര്‍ഗാപുരിലെ സ്വകാര്യ ആശുപത്രിയില്‍ പരിശീലനത്തിലായിരുന്നു രേണു. അടുത്തിടെ സര്‍ക്കാരില്‍ ജോലി ലഭിക്കുകയും ചെയ്തു. ഇതാവാം ഭര്‍ത്താവിനെ പ്രകോപിപ്പിച്ചത്.
