സ്വപ്നയെ തള്ളി പിണറായി ; സംസ്ഥാനത്ത് കലാപത്തിന് കോണ്‍ഗ്രസ് ശ്രമം എന്നും ആരോപണം
സ്വര്‍ണക്കടത്ത് കേസില്‍ സ്വപ്ന സുരേഷിന്റെ ആരോപണം തള്ളി മുഖ്യമന്ത്രി പിണറായി വിജയന്‍. ദുബായ് യാത്രയില്‍ മുഖ്യമന്ത്രി ലഗേജ് എടുക്കാന്‍ മറന്നു എന്ന ആരോപണത്തെയാണ് മുഖ്യമന്ത്രി തള്ളിയത്. ലഗേജ് എടുക്കാന്‍ മറന്നിട്ടില്ല എന്ന് മുഖ്യമന്ത്രി നിയമസഭയില്‍ രേഖാമൂലം മറുപടി നല്‍കി. അന്‍വര്‍ സാദത്ത്, ഷാഫി പറമ്പില്‍, ഐസി ബാലകൃഷ്ണന്‍, റോജി എം ജോണ്‍ എന്നിവരുടെ ചോദ്യത്തിനാണ് മുഖ്യമന്ത്രി മറുപടി നല്‍കിയത്. 2016 മുതല്‍ മുഖ്യമന്ത്രി എത്ര തവണ ദുബായ് സന്ദര്‍ശിച്ചു എന്ന ചോദ്യത്തിന് അഞ്ച് തവണ എന്നായിരുന്നു മറുപടി. സന്ദര്‍ശനങ്ങളെല്ലാം ഔദ്യോഗികമായിരുന്നു എന്നും മുഖ്യമന്ത്രി മറുപടി നല്‍കി. രണ്ടാമത്തെ ചോദ്യമായിരുന്നു ബാഗേജുമായി ബന്ധപ്പെട്ടത്. എന്നാല്‍, ബാഗേജ് എടുക്കാന്‍ മറന്നിട്ടില്ല എന്ന് ചോദ്യത്തിന് മുഖ്യമന്ത്രി മറുപടി നല്‍കി.
രാഹുല്‍ഗാന്ധിയുടെ കല്‍പറ്റയിലെ എം പി ഓഫിസ് എസ് എഫ് ഐ ആക്രമിച്ചതിനെ പിന്തുടര്‍ന്ന് സംസ്ഥാനത്ത് കലാപം ഉണ്ടാക്കാന്‍ കോണ്‍ഗ്രസ് ശ്രമമെന്ന് പിണറായി വിജയന്‍ ആരോപിക്കുന്നു. പാര്‍ട്ടിയും സര്‍ക്കാരും എസ് എഫ് ഐ പ്രവര്‍ത്തകര്‍ക്കെതിരെ നടപടി എടുത്തു. പെണ്‍കുട്ടികള്‍ അടക്കമുള്ളവരെ പൊലീസ് അറസറ്റ് ചെയ്തിട്ടും കോണ്‍ഗ്രസ് കലാപത്തിന് ശ്രമിച്ചുകൊണ്ടേയിരിക്കുന്നുവെന്നും മുഖ്യമന്ത്രി പറഞ്ഞു. എസ് എഫ് ഐ സമരത്തെ സി പി എമ്മും എല്‍ ഡി എഫും അപലപിച്ചു. സര്‍ക്കാര്‍ കര്‍ക്കശമായ നിയമ നടപടികളിലേക്ക് കടന്നു. വീഴ്ച വരുത്തിയ ഡി വൈ എസ് പി യെ സസ്‌പെന്‍ഡ് ചെയ്ത് അന്വേഷണം നടത്തുന്നു. സംഭവത്തെ കുറിച്ച് അന്വേഷിക്കാന്‍ പ്രത്യേക സംഘത്തെ തന്നെ നിയോഗിച്ചു. എന്നിട്ടും അക്രമം നിര്‍ത്താന്‍ കോണ്‍ഗ്രസ് തയാറാകുന്നില്ല.
പ്രകോപനപരമായ പ്രസ്താവനകള്‍ കോണ്‍ഗ്രസ് തുടരുകയാണ്. സി പി എമ്മിന്റെ ഓഫിസുകളും പത്ര സ്ഥാപനങങളും അടക്കം ആക്രമിച്ചു. ആക്രമിക്കാന്‍ , കലാപം ഉണ്ടാക്കാന്‍ കോണ്‍ഗ്രസ് ശ്രമിക്കുകയാണ്. കോണ്‍ഗ്രസിന് രാഷ്ട്രീയ പാപ്പരത്തമാണ്. ഉദ്ദേശ്യ ശുദ്ധിപോലും ഇല്ലെന്നും പിണറായി വിജയന്‍ പറഞ്ഞു. വയനാട്ടിലെ ദേശാഭിമാനി പത്രം ഓഫിസിന് നേരെ ഉണ്ടായ അക്രമത്തെ കോണ്‍ഗ്രസ് തളളിപ്പറഞ്ഞിട്ടുണ്ടോ ? വിളിച്ചു വരുത്തിയ വാര്‍ത്ത സമ്മേളനത്തില്‍ മര്യാദക്കിരിക്കണമെന്ന പ്രതിപക്ഷ നേതാവിന്റെ നിലാപട് എങ്ങനെയാണ് അംഗീകരിക്കുകയെന്നും ചോദ്യങ്ങളെ പ്രതിപക്ഷം ഭയപ്പെടുകയാണെന്നും പിണറായി വിജയന്‍ പറഞ്ഞു. പ്രതിപക്ഷ നേതാവിനോട് കല്‍പറ്റയില്‍ വച്ച് ചോദ്യം ചോദിച്ചപ്പോള്‍ മാധ്യമ പ്രവര്‍ത്തകരെ ഭീഷണി പെടുത്തി. കൈകള്‍ അറുത്തുമാറ്റുമെന്ന അണികളുടെ ഭീഷണിയുമുണ്ടായി. ഇതൊക്കെ എങ്ങനെയാണ് അംഗീകരിക്കാനാകുക. ബി ജെ പി യെ തൃപ്തിപ്പെടുത്താന്‍ വേണ്ടി സി പി എം അക്രമം ചെയ്തുവെന്നാണ് പ്രതിപക്ഷ നേതാവ് പറയുന്നത്.എന്നാലിത് എന്താണെന്ന് ജനത്തിനറിയാം എന്നും മുഖ്യമന്ത്രി വ്യക്തമാക്കി.
