യുവതി വീട്ടില്‍ കൊല്ലപ്പെട്ട നിലയില്‍ ; ആത്മഹത്യക്ക് ശ്രമിച്ച ഭര്‍ത്താവ് ആശുപത്രിയില്‍
കൊല്ലം പുനലൂരില്‍ യുവതിയെ കൊലപ്പെടുത്തി ഭര്‍ത്താവ് ആത്മഹത്യക്ക് ശ്രമിച്ചു. മണിയാര്‍ സ്വദേശി മഞ്ജുവാണ് (35) കൊല്ലപ്പെട്ടത്. ഇന്ന് രാവിലെയാണ് സംഭവം. ഭര്‍ത്താവ് മണികണ്ഠന്‍ മഞ്ജുവിനെ ശ്വാസം മുട്ടിച്ച് കൊലപ്പെടുത്തിയെന്നാണ് സംശയം. ഭര്‍ത്താവിനെ പരുക്കുകളോടെ പുനലൂര്‍ താലൂക്ക് ആശുപത്രിയില്‍ പ്രവേശിപ്പിച്ചിരിക്കുകയാണ്. കൈഞരമ്പ് മുറിച്ച നിലയിലാണ് ഭര്‍ത്താവിനെ ആശുപത്രിയില്‍ പ്രവേശിപ്പിച്ചത്. മൃതദേഹം കണ്ടെത്തുമ്പോള്‍ തലയണ മുഖത്ത് ഇരിക്കുന്ന അവസ്ഥയിലായിരുന്നു.
തലയണ ഉപയോഗിച്ച് ശ്വാസം മുട്ടിച്ച് മഞ്ജുവിനെ കൊലപ്പെടുത്തിയ ശേഷം ഭര്‍ത്താവ് ആത്മഹത്യയ്ക്ക് ശ്രമിച്ചതാവാം എന്നാണ് പ്രാഥമിക നിഗമനം. കൂടുതല്‍ ചോദ്യം ചെയ്യലുകള്‍ക്കും അന്വേഷണങ്ങള്‍ക്കും ശേഷം മാത്രമേ ഇതിനെപ്പറ്റി കൃത്യമായ വിവരം ലഭ്യമാവുകയുള്ളൂ. മഞ്ജുവും ഭര്‍ത്താവ് മണികണ്ഠനും തമ്മില്‍ എന്നും വഴക്കും ബഹളവുമായിരുന്നുവെന്നാണ് പൊലീസ് പറയുന്നത്. കഴിഞ്ഞയാഴ്ച്ചയും പൊലീസ് സ്റ്റേഷനില്‍ വെച്ച് ഇവരുടെ പ്രശ്‌നങ്ങള്‍ പരിഹരിച്ച് വീട്ടിലേക്ക് അയച്ചതാണ്. ഇവരുടെ രണ്ട് കുട്ടികളും മഞ്ജുവിന്റെ സഹോദരനൊപ്പമാണ് താമസിച്ചിരുന്നത്. മദ്യപാനിയായ ഭര്‍ത്താവ് കഴിഞ്ഞ ദിവസം വീട്ടിലെത്തി മക്കള്‍ എവിടെയെന്ന് ചോദിച്ച് മഞ്ജുവിനെ ഉപദ്രവിച്ചിരുന്നുവെന്ന് നാട്ടുകാര്‍ പറയുന്നു.
