വൈറലായി ലളിത് മോദിയും സുസ്മിത സെന്നും തമ്മിലുള്ള ഡേറ്റിങ്ങു ചിത്രങ്ങള്‍
മുന്‍ ലോക സുന്ദരിയും ബോളിവുഡ് താരവുമായ സുസ്മിതാ സെന്നും ഐ പി എല്‍ മുന്‍ ചെയര്‍മാനും വ്യവസായിയുമായ ലളിത് മോദിയും തമ്മിലുള്ള ഡേറ്റിങ് ചിത്രങ്ങള്‍ ആണ് ഇപ്പോള്‍ സൈബര്‍ ലോകത്തെ ചൂടുള്ള വാര്‍ത്ത. ഏവരെയും ഞെട്ടിച്ചുകൊണ്ട് കഴിഞ്ഞ ദിവസമാണ് സുസ്മിതാ സെന്നുമായി താന്‍ ഡേറ്റിങ്ങിലാണെന്ന ലളിത് മോദിയുടെ ട്വീറ്റ് പുറത്തു വന്നത്. സുസ്മിതയ്‌ക്കൊപ്പമുള്ള ചിത്രങ്ങളും അദ്ദേഹം ട്വീറ്റ് ചെയ്തിട്ടുണ്ട്. സുസ്മിതയെ തന്റെ നല്ലപാതി എന്നാണ് അദ്ദേഹം വിശേഷിപ്പിച്ചിരിക്കുന്നത്.
‘മാലെദ്വീപിലും സാര്‍ഡീനിയയിലുമുള്ള സന്ദര്‍ശനം കഴിഞ്ഞ് ലണ്ടനില്‍ മടങ്ങി എത്തിയതേയുള്ളൂ. അവസാനം പുതിയ ജീവിതത്തിന് പുതിയ തുടക്കമായിരിക്കുന്നു’- ലളിത് മോദി ചിത്രങ്ങള്‍ക്കൊപ്പം കുറിച്ചു. എന്നാല്‍ ഇതൊക്കെ എപ്പോള്‍ സംഭവിച്ചു എന്നാണ് സോഷ്യല്‍ മീഡിയ ചോദിക്കുന്നത്. ലളിതിന്റെ ബിസിനസ് പാര്‍ട്ണറാവാം സുസ്മിതയെന്ന് വാദിക്കുന്നവരുമുണ്ട്. എന്നാല്‍ എല്ലാത്തിനും ഉത്തരവുമായി തങ്ങള്‍ ഡേറ്റിങ്ങിലാണെന്നും വിവാഹിതരായിട്ടില്ലെന്നും ലളിത് മോദി വ്യക്തമാക്കി. സുസ്മിത സെന്‍ ഇതുവരെ വിവാഹം കഴിച്ചിട്ടില്ലെങ്കിലും ലളിത് മോദി 2018 ല്‍ തന്റെ ഭാര്യ മിനാല്‍ മോദിയുമായുള്ള വിവാഹ ബന്ധം അവസാനിപ്പിച്ചിരുന്നു.
