മകനെ കാണാന്‍ ഭാര്യ വീട്ടുകാര്‍ സമ്മതിക്കുന്നില്ല ; ഭാര്യ വീടിനു മുന്നില്‍ യുവാവ് തീകൊളുത്തി മരിച്ചു
തിരുവനന്തപുരം കരമന കുഞ്ചാലുംമൂട് സ്വദേശി അഹമ്മദാലി ആണ് മരിച്ചത്. അഹമ്മദാലി തിങ്കളാഴ്ച വിദേശത്തേക്ക് മടങ്ങിപ്പോകാനിരിക്കെയാണ് സംഭവം. കയ്യില്‍ കരുതിയ പെട്രോളൊഴിച്ച് തീകൊളുത്തുകയായിരുന്നു. സംഭവത്തില്‍ അസ്വാഭാവിക മരണത്തിന് പൊലീസ് കേസെടുത്തു. വര്‍ക്കലയിലെ ഭാര്യ വീട്ടിനു മുന്നിലാണ് സംഭവം. ഇന്നലെ വൈകിട്ടാണ് അഹമ്മദാലി വര്‍ക്കല ഇലകമണ്‍ കരവാരത്തെ ഭാര്യ വീട്ടിലെത്തുന്നത്. കയ്യില്‍ പെട്രോള്‍ കുപ്പിയും കരുതിയിരുന്നു. കുടുംബ പ്രശ്‌നങ്ങള്‍ കാരണം അകന്ന് കഴിയുന്നതിനാലും ഇതിന് മുന്‍പും വഴക്കുണ്ടായിട്ടുള്ളതിനാലും അഹമ്മദാലിയെ കണ്ട ഉടനെ ആക്രമണം ഭയന്ന് വീടിനകത്ത് കയറി വാതിലടച്ചെന്നാണ് ഇയാളുടെ ഭാര്യയുടെ പിതാവ് പറയുന്നത്.
വീടിന് പുറകിലെ വാതില്‍ കൂടി അടച്ച് തിരിച്ച് വരുന്നതിനിടെ തീ ആളിപ്പടര്‍ന്നുവെന്ന് ഭാര്യാ പിതാവ് പറയുന്നു. അയല്‍വാസികള്‍ ഓടിയെത്തി തീയണച്ചു. 90 ശതമാനം പൊള്ളലേറ്റ നിലയിലാണ് അഹമ്മദാലിയെ ആശുപത്രിയിലെത്തിക്കുന്നത്. പുലര്‍ച്ചെയോടെ മരണം സംഭവിക്കുകയായിരുന്നു. അഭിപ്രായ വ്യത്യാസങ്ങളെ തുടര്‍ന്ന് കഴിഞ്ഞ രണ്ടരമാസമായി അഹമ്മദലിയും ഭാര്യയും അകന്ന് കഴിയുകയായിരുന്നു. തിങ്കളാഴ്ച വിദേശത്തേക്ക് പോകുന്നതിന് മുമ്പ് ഭാര്യയെയും രണ്ട് വയസ്സുകാരനായ മകനെയും കണ്ട് യാത്ര പറയണമെന്ന ആഗ്രഹത്തിലാണ് ഇയാള്‍ ഭാര്യ വീട്ടില്‍ എത്തിയത്. മുന്‍പ് പലവട്ടം കുഞ്ഞിനെ കാണാന്‍ എത്തിയ സമയത്തു ഭാര്യ വീട്ടുകാര്‍ അതിനു സമ്മതിച്ചിരുന്നില്ല. അതുകൊണ്ടുതന്നെ
ഇത്തവണ അവരെ ഭയപ്പെടുത്താന്‍ ഒരു കുപ്പി പെട്രോളും കയ്യില്‍ കരുതിയിട്ടുണ്ടെന്നു അഹമ്മദാലി പറഞ്ഞിരുന്നുവെന്നാണ് ബന്ധുക്കള്‍ പറയുന്നത്. ആത്മഹത്യ ഭീഷണി മുഴക്കിയ ശേഷവും ഭാര്യ വീട്ടുകാര്‍ പ്രതികരിക്കാത്തതില്‍ പെട്ടന്നുണ്ടായ ദേഷ്യത്തിലാകാം ഇയാള്‍ ആത്മഹത്യ ചെയ്തത് എന്ന് പോലീസ് പറയുന്നു.
