സൗദിയില്‍ കാറുകള്‍ കൂട്ടിയിടിച്ച് കത്തി ആറ് പേര്‍ മരിച്ചു
സൗദി അറേബ്യയില്‍ കാറുകള്‍ കൂട്ടിയിടിച്ച് ആറു പേര്‍ മരണപ്പെട്ടു. സംഭവത്തില്‍ രണ്ടു കുട്ടികള്‍ക്ക് പരിക്കേല്‍ക്കുകയും ചെയ്തു. റിയാദ് പ്രവിശ്യയില്‍ പെട്ട ശഖ്റാക്ക് പടിഞ്ഞാറ് 18 കിലോമീറ്റര്‍ ദൂരെ അല്‍സ്വഹന്‍ റോഡില്‍ ഇന്നലെ പുലര്‍ച്ചെയാണ് അപകടം സംഭവിച്ചത്. കുവൈത്ത് രജിസ്ട്രേഷനിലുള്ള ബി.എം.ഡബ്ല്യൂ കാറും സൗദി രജിസ്ട്രേഷനുള്ള പിക്കപ്പും നേര്‍ക്കുനേരെ കൂട്ടിയിടിക്കുകയായിരുന്നു.
ഇടിയുടെ ആഘാതത്തില്‍ ഇരു കാറുകളിലും തീ പടര്‍ന്നു പിടിച്ചു. കാര്‍ ഡ്രൈവറും മൂന്നു സ്ത്രീകളും കുടുംബത്തിലെ വീട്ടുജോലിക്കാരിയും പിക്കപ്പ് ഓടിച്ചിരുന്ന യുവാവുമാണ് അപകടത്തില്‍ മരിച്ചത്. കാര്‍ യാത്ര ചെയ്തിരുന്ന മൂന്നും അഞ്ചും വീതം വയസ് പ്രായമുള്ള രണ്ടു കുട്ടികള്‍ പരിക്കുകളോടെ രക്ഷപ്പെട്ടു. ഇടിയുടെ ആഘാതത്തില്‍ കാറില്‍ നിന്ന് പുറത്തേക്ക് തെറിച്ചുവീണതാണ് ജീവനോടെ രക്ഷപ്പെടാന്‍ കുട്ടികളെ സഹായിച്ചത്. പരിക്കേറ്റ കുട്ടികളെ ശഖ്റാ ജനറല്‍ ആശുപത്രിയില്‍ പ്രവേശിപ്പിച്ചു.
