കേരളാ ഗവര്‍ണര്‍ ആരിഫ് മുഹമ്മദ് ഖാന്റെ ഫേസ്ബുക്ക് പേജ് ഹാക്ക് ചെയ്തു
ഗവര്‍ണര്‍ ആരിഫ് മുഹമ്മദ് ഖാന്റെ ഔദ്യോഗിക ഫേസ്ബുക്ക് അക്കൌണ്ട് ഹാക്ക് ചെയ്തു. ശനിയാഴ്ച രാവിലെ മുതലാണ് ഫേസ്ബുക്ക് അക്കൌണ്ട് ഹാക്ക് ചെയ്യപ്പെട്ടത് എന്നാണ് രാജ് ഭവന്‍ വൃത്തങ്ങള്‍ അറിയിക്കുന്നത്. കേരള ഗവര്‍ണറുടെ ഔദ്യോഗി ട്വിറ്റര്‍ അക്കൌണ്ടിലൂടെയാണ് ഫേസ്ബുക്ക് പേജ് ഹാക്ക് ചെയ്യപ്പെട്ട വിവരം രാജ് ഭവന്‍ അറിയിച്ചത്. ‘ഇന്ന് രാവിലെ മുതല്‍ എന്റെ ഫേസ്ബുക്ക് പേജ് ഹാക്ക് ചെയ്യപ്പെട്ടിരിക്കുകയാണ്.
വിഷയം ഫേസ്ബുക്കിന് റിപ്പോര്‍ട്ട് ചെയ്യപ്പെട്ടിട്ടുണ്ട്, പേജ് പുനഃസ്ഥാപിക്കാനുള്ള ശ്രമങ്ങള്‍ തുടരുകയാണ് ‘ എന്ന് ട്വിറ്റര്‍ പോസ്റ്റില്‍ ഗവര്‍ണര്‍ക്ക് വേണ്ടി രാജ് ഭവന്‍ പിആര്‍ഒ പറയുന്നു. ഇത് സംബന്ധിച്ച് രാജ്ഭവന്‍ സൈബര്‍ സെല്ലിന് പരാതിയും നല്‍കി. സംസ്ഥാന സര്‍ക്കാരുമായി അടുത്തകാലത്ത് തുറന്ന യുദ്ധം പ്രഖ്യാപിച്ച വേളയില്‍ തന്നെയാണ് ഗവര്‍ണ്ണറുടെ പേജ് ഹാക്ക് ആയത് എന്നതും ശ്രദ്ധിക്കേണ്ട കാര്യമാണ്. അതേസമയം കഴിഞ്ഞ ആഴ്ച കൊച്ചി മേയറുടെ പേജ് ഹാക്ക് ചെയ്യപ്പെട്ടിരുന്നു.
