ലഹരി തലയ്ക്ക് പിടിച്ചപ്പോള്‍ മകന്‍ മാതാപിതാക്കളെ കുത്തിവീഴ്ത്തി ; പൊലീസ് യുവാവിനെ കീഴടക്കിയത് ആകാശത്തേക്ക് വെടിവെച്ചു
കോഴിക്കോട് എരഞ്ഞിപ്പാലം സ്വദേശി ഷാജി (50), ബിജി (48) എന്നിവരെയാണ് ലഹരിക്കടിമയായ മകന്‍ ഷൈന്‍ കുത്തിപ്പരിക്കേല്‍പ്പിച്ചത്. സംഭവം അറിഞ്ഞു യുവാവിനെ കസ്റ്റഡിയിലെടുക്കാന്‍ വന്ന പൊലീസ് ഇയാളെ പിടികൂടാന്‍ രണ്ടു തവണ ആകാശത്തേക്ക് വെടിവെച്ചു. പരിക്കേറ്റ ഇരുവരെയും കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചു. പിതാവ് ഷാജിയുടെ പരിക്ക് ഗുരുതരമാണ്. മല്‍പ്പിടിത്തത്തിനിടെ ഷൈനും പരിക്കേറ്റിരുന്നു. ഇയാളും ചികിത്സയിലാണ്.
ഞായറാഴ്ച രാത്രിയാണ് സംഭവം. മാതാപിതാക്കളെ കുത്തിയ ഷൈന്‍ മണിക്കൂറുകളോളം ഭീകരാന്തരീക്ഷം സൃഷ്ടിച്ചു. ഇതോടെ ഇയാളെ കീഴടക്കാന്‍ പൊലീസിന് രണ്ടു തവണ ആകാശത്തേക്ക് വെടിവെക്കേണ്ടി വന്നു. ഒടുവില്‍ ഷൈനിനെ പൊലീസ് കസ്റ്റഡിയിലെടുക്കുകയായിരുന്നു. ഷൈന്‍ കൂടിയ ഇനം മയക്കുമരുന്ന് ഉപയോഗിച്ചെന്ന് പൊലീസ് പറയുന്നു. അച്ഛനും അമ്മയും തന്നെ അവഗണിക്കുന്നുവെന്നും സ്വത്ത് ഭാഗം വച്ചപ്പോള്‍ ഉള്‍പ്പെടെ തന്നെ വേണ്ടരീതിയില്‍ പരിഗണിച്ചില്ലെന്നും ആരോപിച്ചായിരുന്നു മകന്റെ ആക്രമണം.
