ബലാത്സംഗ കേസില്‍ ജാമ്യത്തിലിറങ്ങിയതിന് പിന്നാലെ വീഡിയോയുമായി മീശ ചേട്ടന്‍
ബലാത്സംഗക്കേസില്‍ റിമാന്‍ഡില്‍ ആയിരുന്ന മീശ എന്ന പേരില്‍ സോഷ്യല്‍ മീഡിയയില്‍ വൈറല്‍ ആയ പ്രമുഖ റീല്‍സ് താരം വിനീത് ജാമ്യത്തിലിറങ്ങി. പുറത്തു വന്നതിനു പിന്നാലെ തന്നെ പരിഹസിച്ചവര്‍ക്ക് എതിരെ പുതിയ വീഡിയോ സ്റ്റോറി ആശാന്‍ പോസ്റ്റും ചെയ്തു. ആഡംബരകാറില്‍ സിഗരറ്റും വലിച്ച് വന്നിറങ്ങുന്ന വീഡിയോക്കൊപ്പം കുറിപ്പും നല്‍കിയാണ് ഇയാളുടെ പുതിയ വീഡിയോ. ട്രോള്‍ ചെയ്ത് ഇത്രയും വളര്‍ത്തിയ എന്റെ ട്രോളന്മാര്‍ക്ക്, അകത്തോട്ട് തള്ളിവിട്ട ചേട്ടന്‍ ഇവിടെ ഉണ്ടല്ലോല്ലേ എന്നാണ് വീഡിയോക്കൊപ്പമുള്ള കുറിപ്പില്‍ പറയുന്നത്.
കോളേജ് വിദ്യാഥിയെ ബലാത്സംഗം ചെയ്ത കേസിലാണ് റീല്‍സ് താരമായ വിനീത് അറസ്റ്റിലായത്. ഇന്‍സ്റ്റഗ്രാമിലൂടെ പരിചയപ്പെടുന്ന സ്ത്രീകളുമായി ബന്ധം സ്ഥാപിക്കുന്ന ഇയാള്‍ ഇവരുമൊത്തുള്ള സ്വകാര്യ ദൃശ്യങ്ങള്‍ മൊബൈലില്‍ പകര്‍ത്തി ഭീഷണിപ്പെടുത്തിയിരുന്നുവെന്നും പരാതി ഉണ്ടായിരുന്നു. ഇവരുമൊത്തുള്ള സ്വകാര്യ ചാറ്റുകള്‍ റെക്കോര്‍ഡ് ചെയ്ത് സൂക്ഷിക്കുകയും ചെയ്തിരുന്നതായി പൊലീസ് കണ്ടെത്തിയിരുന്നു. തിരുവനന്തപുരം ചിറയിന്‍കീഴ് സ്വദേശിയാണ് വിനീത്. ഇയാളുടെ ഫോണ്‍ പരിശോധിച്ച പൊലീസ് സംഘത്തിന് ഒട്ടേറെ സ്ത്രീകള്‍ വിനീതിന്റെ വലയില്‍ കുടുങ്ങിയതായി കണ്ടെത്തിയിരുന്നു.
കാര്‍ വാങ്ങാന്‍ ഒപ്പം ചെല്ലാന്‍ ആവശ്യപ്പെട്ട വിദ്യാര്‍ത്ഥിനിയെ തലസ്ഥാനത്തെ സ്വകാര്യ ഹോട്ടലില്‍ എത്തിച്ച് ബലാത്സംഗം ചെയ്തു എന്ന പരാതിയില്‍ അറസ്റ്റിലായ ഇയാളെ കോടതി റിമാന്‍ഡ് ചെയ്തിരുന്നു. കേസില്‍ ജാമ്യം നേടി പുറത്തിറങ്ങിയതിന് പിന്നാലെയാണ് പുതിയ വീഡിയോയുമായി രംഗത്തെത്തിയത്. ടിക് ടോകില്‍ വീഡിയോകള്‍ ഇട്ട് താരമായ വിനീത് പിന്നീട് പല സമൂഹ മാധ്യമങ്ങളിലും വീഡിയോകളിട്ട് ഫാന്‍സ് വലയം തന്നെയുണ്ടാക്കിയിരുന്നു. വീട്ടമ്മമാരെയും പെണ്‍കുട്ടികളേയും സമീപിച്ച് സമൂഹ മാധ്യമങ്ങളില്‍ വൈറലാകാനുള്ള ടിപ്‌സ് നല്‍കി സൗഹൃദം സ്ഥാപിക്കുന്നതാണ് ഇയാളുടെ രീതി. പൊലീസില്‍ ജോലി ഉണ്ടായിരുന്ന താന്‍ ചില ശാരീരിക പ്രശ്‌നങ്ങള്‍ കാരണം ജോലി രാജി വെച്ചു എന്നും ഇപ്പൊള്‍ ഒരു പ്രമുഖ ചാനലില്‍ ജോലി ചെയ്യുന്നു എന്നുമാണ് ഇയാള്‍ സൗഹൃദം സ്ഥാപിക്കുന്ന യുവതികളോട് പറഞ്ഞിരുന്നത്. എന്നാല്‍ സമൂഹ മാധ്യമങ്ങളില്‍ റീല്‍സ് ഇടുന്നത് അല്ലാതെ ഇയാള്‍ക്ക് മറ്റ് ജോലികള്‍ ഇല്ല എന്നാണ് പൊലീസ് വ്യക്തമാക്കിയത്.
