പത്തനം തിട്ടയില്‍ വിദ്യാര്‍ത്ഥികള്‍ക്ക് നേരെ സദാചാര ആക്രമണം ; മൂന്ന് പേര്‍ അറസ്റ്റില്‍
പത്തനംതിട്ടയില്‍ വിദ്യാര്‍ത്ഥികള്‍ക്ക് നേരെയുള്ള സദാചാര ആക്രമണത്തില്‍ മൂന്ന് പേരെ പൊലീസ് അറസ്റ്റ് ചെയ്തു. സുജിത് കുമാര്‍, അനുപമ സുജിത്, അനു പി. ചന്ദ്രന്‍ എന്നിവരാണ് പിടിയിലായത്. ആറന്മുള പൊലീസാണ് പ്രതികളെ അറസ്റ്റ് ചെയ്തത്. പാലത്തില്‍ ഒരുമിച്ചിരുന്ന വിദ്യാര്‍ത്ഥികള്‍ക്ക് നേരെ ഇവര്‍ സദാചാര ആക്രമണം നടത്തുകയായിരുന്നു. കോഴഞ്ചേരി സെന്റ് തോമസ് കോളജിലെ വിദ്യാര്‍ത്ഥികള്‍ക്ക് നേരെയാണ് സദാചാര ആക്രമണം ഉണ്ടായത്.
മൂന്ന് ആണ്‍കുട്ടികളും രണ്ട് പെണ്‍കുട്ടികളും പാലത്തില്‍ ഒരുമിച്ച് ഇരുന്നത് ചോദ്യം ചെയ്ത് മര്‍ദ്ദിച്ചുവെന്ന് കാട്ടി കുട്ടികള്‍ പൊലീസില്‍ പരാതി നല്‍കിയിരുന്നു. വിദ്യാര്‍ത്ഥികളായ വിഷ്ണു, സല്‍മാന്‍, ആദര്‍ശ് എന്നിവരാണ് പരാതി നല്‍കിയത്. പാലത്തില്‍ നിന്നും തള്ളിത്താഴെയിടുമെന്ന് ഭീഷണിപ്പെടുത്തിയതായും കുട്ടികള്‍ വെളിപ്പെടുത്തുന്നു. റാന്നി വാഴക്കുന്നത്താണ് സംഭവം നടന്നത്. കാറിന് വഴി കൊടുക്കാത്തതിനെ തുടര്‍ന്നുണ്ടായ തര്‍ക്കമെന്നാണ് പൊലീസ് പറയുന്നത്. ഇന്നലെ ഉച്ചയ്ക്കായിരുന്നു സംഭവം.
