വ്‌ലോഗര്‍ വിക്കി തഗ് മയക്കുമരുന്നും തോക്കും വെട്ടുകത്തിയുമായി അറസ്റ്റില്‍
യുവാക്കളുടെ ഇഷ്ട വ്‌ലോഗര്‍ ആയ വിക്കി തഗ് എന്ന പേരില്‍ അറിയപ്പെടുന്ന ആലപ്പുഴ ചുനക്കര ദേശം മംഗലത്ത് വിഘ്‌നേഷ് വേണു(25) അറസ്റ്റില്‍. കാറില്‍ മയക്കുമരുന്നു കടത്താന്‍ ശ്രമിക്കുന്നതിന്റെ ഇടയിലാണ് വ്‌ലോഗര്‍ ഉള്‍പ്പെടെ രണ്ടു പേര്‍ പിടിയിലായത്. കായംകുളം ഓച്ചിറ കൃഷ്ണപുരം കൊച്ചുമുറി എസ്. വിനീത്(28) ആണ് അറസ്റ്റിലായ മറ്റൊരാള്‍. വിക്കി തഗ് എന്നറിയപ്പെടുന്ന വിഘ്‌നേഷ് വേണു സോഷ്യല്‍ മീഡിയയില്‍ നിരവധി ഫോളോവേഴ്‌സുള്ളയാളാണ്.
വാളയാറില്‍ വാഹന പരിശോധനയ്ക്കിടെ നിര്‍ത്താതെ പോയ കാര്‍ എക്‌സൈസ് പിന്തുടര്‍ന്ന് പിടികൂടുകയായിരുന്നു. വാളയാര്‍ ടോള്‍ പ്ലാസയിലെ ഡിവൈഡര്‍ ഇടിച്ചു തകര്‍ത്താണ് കാര്‍ കടന്നുപോയത്. ഇവരില്‍ നിന്ന് 40 ഗ്രാം മെന്നാംഫെറ്റമിന്‍, തോക്ക്, വെട്ടുകത്തികള്‍ എന്നിവ കണ്ടെത്തി.പിടിച്ചെടുത്ത തോക്കിന് ലൈസന്‍സുണ്ടായിരുന്നില്ല. ഇരുവരും വലിയ അളവില്‍ ലഹരി ഉപയോഗിച്ചതിനാല്‍ ചോദ്യം ചെയ്യലിനോട് സഹകരിച്ചിട്ടില്ലെന്ന് ഉദ്യോഗസ്ഥര്‍ പറയുന്നു. ‘വിക്കി തഗ്’ എന്ന യൂട്യൂബ് ചാനലിലൂടെ വിഘ്‌നേഷ് ലഹരി ഉപയോഗം പ്രോത്സാഹിപ്പിക്കുന്ന തരത്തിലുള്ള വീഡിയോ പോസ്റ്റ് ചെയ്തതായും എക്‌സൈസിന് വിവരം ലഭിച്ചു. ഇത് പരിശോധിച്ചു വരികയാണ്.
