മസ്തിഷ്‌കാഘാതം ; യുവ നടി ആന്‍ഡ്രില അന്തരിച്ചു
മസ്തിഷ്‌കാഘാതത്തെ തുടര്‍ന്ന് ഗുരുതരാവസ്ഥയിലായിരുന്ന ബംഗാളി ചലച്ചിത്രതാരം ആന്‍ഡ്രില ശര്‍മ അന്തരിച്ചു. 24 വയസ്സായിരുന്നു. നവംബര്‍ 15 നാണ് മസ്തിഷ്‌കാഘാതത്തെ തുടര്‍ന്ന് ആന്‍ഡ്രിലയെ ആശുപത്രിയില്‍ പ്രവേശിപ്പിച്ചത്. തുടര്‍ച്ചയായ ഹൃദയാഘാതത്തെ തുടര്‍ന്ന് ഗുരുതരാവസ്ഥയിലായിരുന്നു ആന്‍ഡ്രിലയെ വെന്റിലേറ്ററിന്റെ സഹായത്തോടെയാണ് ജീവന്‍ നിലനിര്‍ത്തിയിരുന്നത്. നടിയുടെ സിടി സ്‌കാന്‍ റിപ്പോര്‍ട്ടുകളും പുറത്തുവന്നിട്ടുണ്ട്. തലച്ചോറില്‍ രക്തം കട്ടപിടിച്ചതായാണ് റിപ്പോര്‍ട്ടിലുള്ളത്.
ഗുരുതരാവസ്ഥയിലായിരുന്ന നടിക്ക് കാര്‍ഡിയോ പള്‍മണറി റെസസിറ്റേഷന്‍ (സിപിആര്‍) നല്‍കിയതായി വിവിധ മാധ്യമ റിപ്പോര്‍ട്ടില്‍ പറയുന്നു. ആന്തരിക രക്തസ്രാവത്തെ തുടര്‍ന്ന് ഫ്രണ്ടോടെംപോറോപാരിയറ്റല്‍ ഡി-കംപ്രസീവ് ക്രാനിയോടോമി സര്‍ജറിയും നടത്തിയിരുന്നു. രണ്ട് തവണ അര്‍ബുദത്തെ അതിജീവിച്ച വ്യക്തിയാണ് ആന്‍ഡ്രില. ജുമുറിലൂടെ ടിവിയില്‍ അരങ്ങേറ്റം കുറിച്ച അവര്‍ ജിബോണ്‍ ജ്യോതി, ജിയോന്‍ കത്തി തുടങ്ങിയ ജനപ്രിയ ഷോകളില്‍ പ്രത്യക്ഷപ്പെട്ടു. ഏതാനും ചില സിനിമകളിലും ഒടിടി സീരീസുകളിലും അഭിനയിച്ചിട്ടുണ്ട്
