മലപ്പുറത്ത് വള്ളംമറിഞ്ഞ് ഉണ്ടായ അപകടത്തില്‍ മരിച്ചവരുടെ എണ്ണം 4 ആയി
മലപ്പുറം : തിരൂര്‍ പുറത്തൂരില്‍ ഭാരതപ്പുഴയില്‍ വള്ളം മറിഞ്ഞ് ഉണ്ടായ അപകടത്തില്‍ മരിച്ചവരുടെ എണ്ണം നാലായി. കാണാതായ രണ്ട് പേരുടെ മൃതദേഹങ്ങള്‍ കൂടി ഇന്ന് രാവിലെ ലഭിച്ചു. ഇട്ടികപ്പറമ്പില്‍ അബ്ദുല്‍ സലാം ,കുഴിയിനി പറമ്പില്‍ അബൂബക്കര്‍ എന്നിവരുടെ മൃതദേഹങ്ങളാണ് കണ്ടെത്തിയത്.മൃതദേഹങ്ങള്‍ തിരൂര്‍ ജില്ലാ ആശുപത്രിയിലേക്ക് മാറ്റി. അപകടം നടന്ന സ്ഥലത്തിന്റെ പരിസരത്ത് നിന്നു തന്നെയാണ് മൃതദേഹങ്ങള്‍ ലഭിച്ചത്.
ഇന്നലെ ഉച്ചയോടെ കക്ക വരാന്‍ പോയ നാല് സ്ത്രീകളുള്‍പ്പെടുന്ന ആറംഗ സംഘം കരയിലേക്ക് മടങ്ങുന്നതിനിടെ വള്ളം താഴുകയും ആറ് പേരും ഒഴുക്കില്‍പെടുകയുമായിരുന്നു. ഭാരക്കൂടുതല്‍ ആണ് അപകടകാരണം എന്നാണ് വിലയിരുത്തല്‍. പ്രദേശവാസികളായ ഈന്തു കാട്ടില്‍ ഹംസയുടെ ഭാര്യ റുഖിയ (60), വിളക്കത്ര വളപ്പില്‍ മുഹമ്മദിന്റെ ഭാര്യ സൈനബ (54) എന്നിവരുടെ മൃതദേഹങ്ങള്‍ നേരത്തെ കണ്ടെടുത്തിരുന്നു.
