ആംബുലന്‍സില്‍ മയക്കുമരുന്ന് കടത്ത് ; 2 പേര്‍ അറസ്റ്റില്‍
കൊല്‍ക്കൊത്തയില്‍ ആംബുലന്‍സില്‍ കടത്താന്‍ ശ്രമിച്ച 50 കിലോഗ്രാം മയക്കുമരുന്നു പിടികൂടി. സംഭവത്തില്‍ രണ്ടുപേര്‍ പിടിയിലായി. രഹസ്യ വിവരത്തിന്റെ അടിസ്ഥാനത്തില്‍ പൊലീസ് നടത്തിയ പരിശോധനയിലാണ് മയക്കുമരുന്ന് പിടികൂടിയത്. കൊല്‍ക്കത്തയിലെ ഹേസ്റ്റിംഗ്‌സ് ഏരിയയില്‍ വച്ച് പശ്ചിമ ബംഗാള്‍ നമ്പര്‍ പ്ലേറ്റുള്ള ആംബുലന്‍സ് പൊലീസ് തടഞ്ഞു. പരിശോധനയ്ക്കിടെ ആംബുലന്‍സിന്റെ പിന്‍ഭാഗത്ത് മൂന്ന് വലിയ നൈലോണ്‍ ഷോപ്പിംഗ് ബാഗുകള്‍ കണ്ടെത്തി. 53.735 കിലോഗ്രാം തൂക്കമുള്ള കഞ്ചാവാണ് ബാഗില്‍ ഉണ്ടായിരുന്നത്. ആംബുലന്‍സില്‍ ഉണ്ടായിരുന്ന രണ്ടു പേരെയും വാഹനവും പൊലീസ് കസ്റ്റഡിയില്‍ എടുത്തു. ഒഡീഷ സ്വദേശികളായ 35 കാരനായ ഭോലാനാഥ് സിംഗ് അലോക് ഷാ എന്നിവരാണ് അറസ്റ്റിലായത്. സംഭവത്തില്‍ ലാല്‍ബസാറിലെ നാര്‍ക്കോട്ടിക് വിഭാഗം അന്വേഷണം ആരംഭിച്ചു.
