ഷാരോണ്‍ വധം ; കോടതിയില്‍ മൊഴി മാറ്റി ഗ്രീഷ്മ
ഷാരോണ്‍ കൊലപാതക കേസില്‍ കോടതിയില്‍ മൊഴി മാറ്റി മുഖ്യ പ്രതി ഗ്രീഷ്മ. കൊലപാതകം സമ്മതിച്ചത് പൊലീസിന്റെ ഭീഷണിയെ തുടര്‍ന്നാണെന്ന് ഗ്രീഷ്മ കോടതിയില്‍ പറഞ്ഞു. അച്ഛനേയും അമ്മയേയും കേസില്‍ പ്രതികളാക്കുമെന്നായിരുന്നു ഭീഷണിയെന്നും കോടതിയില്‍ ഗ്രീഷ്മ മൊഴി നല്‍കി. കോളിളക്കം സൃഷ്ടിച്ച ഷാരോണ്‍ വധക്കേസില്‍ ഒന്നാം പ്രതിയായ ഗ്രീഷ്മയെ റിമാന്‍ഡ് കാലാവധി അവസാനിച്ചതിനെ തുടര്‍ന്ന് കോടതിയില്‍ ഹാജരാക്കിയപ്പോഴാണ് പൊലീസിനെതിരെ ആരോപണം ഉന്നയിച്ചത്. അട്ടക്കുളങ്ങര വനിതാ ജയിലില്‍ നിന്ന് വീഡിയോ കോണ്‍ഫറന്‍സിലൂടെയാണ് ഹാജരാക്കിയത്. തനിക്ക് ചില പരാതികള്‍ പറയാനുണ്ടെന്ന് നെയ്യാറ്റിന്‍കര മജിസ്‌ട്രേറ്റ് കോടതിയോടാണ് ഗ്രീഷ്മ അറിയിച്ചത്.
തുടര്‍ന്ന് പ്രതിയെ നേരിട്ട് ഹാജരാക്കാന്‍ ജയില്‍ അധികൃതരോട് കോടതി നിര്‍ദ്ദേശിച്ചു. സുഹൃത്തായ ഷാരോണിനെ വിഷം നല്‍കി കൊല്ലാന്‍ ശ്രമിച്ചിട്ടില്ലെന്ന് ഗ്രീഷ്മ കോടതിയില്‍ ഇന്നലെ ഹാജരാക്കിയപ്പോള്‍ നേരിട്ട് പറഞ്ഞു. അച്ഛനെയും അമ്മയെയും പ്രതിയാക്കുമെന്ന് ഭീഷണിപ്പെടുത്തിയാണ് കുറ്റസമ്മതം നടത്തിച്ചതെന്നാണ് ഗ്രീഷ്മയുടെ മൊഴി. കോടതി മുറിയിലുണ്ടായിരുന്ന മറ്റ് ആളുകളെ ഒഴിപ്പിച്ച ശേഷമാണ് മൊഴി രേഖപ്പെടുത്തിയത്. എന്നാല്‍ ഗ്രീഷ്മയുടെ ആരോപണം തള്ളുകയാണ് അന്വേഷണ സംഘം. പ്രതികള്‍ രക്ഷപ്പെടാനായി കോടതിയില്‍ മൊഴിമാറ്റുന്നത് സ്വാഭാവികമാണെന്നും ഗ്രീഷ്മക്കെതിരെ ശക്തമായ തെളിവുകളുണ്ടെന്നും അന്വേഷണ സംഘം പറയുന്നു. അതേസമയം ഗ്രീഷ്മയുടെ റിമാന്‍ഡ് കാലാവധി കോടതി 14 ദിസത്തേക്ക് കൂടി നീട്ടി ഉത്തരവിറക്കി.
