മലയാറ്റൂരില്‍ കാര്‍ ചിറയിലേക്ക് വീണു രണ്ടു പേര്‍ മരിച്ചു
മലയാറ്റൂരില്‍ കാര്‍ ചിറയിലേക്ക് വീണുണ്ടായ അപകടത്തില്‍ രണ്ട് പേര്‍ മരിച്ചു. ഇടുക്കി ഉപ്പുതറ സ്വദേശി ശ്രീനിവാസന്‍, മുരിക്കാശ്ശേരി സ്വദേശി ബിനു എന്നിവരാണ് മരിച്ചത്. ഇവരുടെ കൂടെ കാറില്‍ ഉണ്ടായിരുന്ന അഖില്‍ എന്നയാള്‍ രക്ഷപ്പെട്ടു. അടിവാരത്തുള്ള മണപ്പാട്ട് ചിറയിലാണ് അപകടമുണ്ടായത്. പെരുമ്പാവൂരിലെ സ്വകാര്യ സ്ഥാപനത്തിലെ ജീവനക്കാരാണ് അപകടത്തില്‍ മരിച്ച രണ്ടുപേരും. സംഘം നക്ഷത്ര തടാകം കാണുന്നതിന് എത്തിയതായിരുന്നുവെന്നാണ് പൊലീസ് പറയുന്നത്. മണപ്പാട്ട് ചിറക്കടുത്ത് എത്തിയപ്പോള്‍ സഹയാത്രക്കാരനായ അഖിലിന് ഫോണ്‍ ചെയ്യാനായി വാഹനം നിര്‍ത്തി.
ഫോണ്‍ കട്ട് ചെയ്ത് അഖില്‍ കയറുന്നതിന് തൊട്ട് മുന്‍പ് മുന്നോട്ട് എടുക്കാന്‍ ശ്രമിച്ച വാഹനം നിയന്ത്രണം നഷ്ടമായി ചിറയിലേക്ക് പതിക്കുകയായിരുന്നുവെന്നാണ് ദൃകസാക്ഷികള്‍ പറയുന്നത്.ഉടന്‍ രക്ഷാ പ്രവര്‍ത്തനം തുടങ്ങിയെങ്കിലും കാറില്‍ ഉണ്ടായിരുന്ന രണ്ടുപേരും മരിച്ചിരുന്നു. ഇടുക്കി ഉപ്പുതറ സ്വദേശിയാണ് ശ്രീനിവാസന്‍, ബിനു മുരിക്കാശ്ശേരി സ്വദേശിയും. ബിനു ആയിരുന്നു കാര്‍ ഓടിച്ചിരുന്നത്. കാറിന്റെ ഡോര്‍ പൊളിച്ചാണ് യാത്രക്കാരെ പുറത്തെടുത്തത്. അപകടത്തില്‍പെട്ട വാഹനം പിന്നീട് ചിറയില്‍ നിന്ന് പുറത്തെടുത്തു. നാട്ടുകാരും ഫയര്‍ഫോഴ്‌സും ചേര്‍ന്നാണ് രക്ഷാപ്രവര്‍ത്തനത്തിന് നേതൃത്വം കൊടുത്തത്. മൃതദേഹം പോസ്റ്റ്‌മോര്‍ട്ട നടപടികള്‍ക്ക് ശേഷം ബന്ധുക്കള്‍ക്ക് വിട്ട് നല്‍കും.
