കൈരളി നികേതന്‍ സ്‌കൂളില്‍ ക്രിസ്മസ് ആഘോഷിച്ചു
വിയന്ന: വിവിധ കലാപരിപാടികളുടെ അകമ്പടിയോടെ കൈരളി നികേതന്‍ സ്‌കൂളിലെ കുട്ടികളും, മാതാപിതാക്കളും അധ്യാപകരും ചേര്‍ന്ന് ക്രിസ്മസ് ആഘോഷിച്ചു. സ്‌കൂള്‍ കോഓര്‍ഡിനേറ്റര്‍ എബി കുര്യന്‍ സ്വാഗതം ആശംസിച്ച സമ്മേളനത്തില്‍ ഫാ. തോമസ് താണ്ടപ്പിള്ളി ക്രിസ്മസ് സന്ദേശം നല്‍കി.
സീറോ മലബാര്‍ സമൂഹത്തിന്റെ ജനറല്‍ കണ്‍വീനര്‍ ജോഷി മുളങ്കുഴി സംസാരിച്ചു. ഫാ. വില്‍സണ്‍ മേച്ചേരില്‍ ക്രിസ്മസ് ഗാനം ആലപിച്ചു. സ്‌കൂള്‍ അദ്ധ്യാപിക കുമുദിനി കൈന്തല്‍ പഠിപ്പിച്ച ക്ലാസിക്കല്‍ നൃത്തത്തോടുകൂടി കലാപരിപാടികള്‍ ആരംഭിച്ചു. തുടര്‍ന്ന് വിവിധ കുട്ടികളുടെ ക്രിസ്മസ് കലാപരിപാടികള്‍ നടന്നു. ക്രിസ്മസ് പാപ്പയായി എത്തിയ സെബാസ്റ്റ്യന്‍ കിണറ്റുകര കുട്ടികള്‍ക്ക് മധുരം വിതരണം ചെയ്തു.
സ്‌കൂള്‍ കമ്മിറ്റിയും, ടീച്ചര്‍മാരും, മാതാപിതാക്കളും ആഘോഷം അവിസ്മരണീയമാക്കുന്നതില്‍ മുഖ്യ പങ്കുവഹിച്ചു. കൈരളി സ്‌കൂളില്‍ 23 വര്‍ഷം മലയാളം അധ്യാപകനായി തുടരുന്ന ബോബന്‍ കളപുരയ്ക്കലിനെ പൊന്നാട അണിയിച്ചു ആദരിച്ചു. 200-ല്‍ അധികം പേര്‍ പങ്കെടുത്ത ആഘോഷം സ്നേഹവിരുന്നോടെ സമാപിച്ചു.
