കൈക്കൂലി കണക്കുപറഞ്ഞ് വാങ്ങുന്ന ഗ്രേഡ് എസ്‌ഐയുടെ വീഡിയോ വൈറല്‍
കൈക്കൂലി ആവശ്യപ്പെടുന്ന എറണാകുളം അയ്യമ്പുഴ ഗ്രേഡ് എസ്. ഐയുടെ ദൃശ്യങ്ങള്‍ വൈറല്‍.ഗ്രേഡ് എസ്.ഐ. ബൈജു കുട്ടന്‍ ആണ് രണ്ട് ലോഡ് മണല്‍ കടത്താന്‍ 500 രൂപ പോരെന്ന് പറഞ്ഞു കൂടുതല്‍ പണം ചോദിച്ചു വാങ്ങുന്നത്. രണ്ടു ലോഡ് മണ്ണ് കടത്താന്‍ 500 രൂപ കൈക്കൂലി പോരെന്ന് ഗ്രേഡ് എസ്.ഐ. ബൈജു കുട്ടന്‍ പറയുന്നത് ദൃശ്യങ്ങളില്‍ വ്യക്തമാണ്. സ്റ്റേഷനിലെ കണ്‍ട്രോള്‍ റൂം വാഹനത്തില്‍ പെട്രോളിങ്ങിന് ഇറങ്ങിയപ്പോഴാണ് കണക്കുപറഞ്ഞ് പിരിക്കുന്നത്. നിരവധി ക്വാറികളും മണ്ണെടുപ്പ് കേന്ദ്രങ്ങളുമുളള മേഖലയാണ് അയ്യമ്പുഴ.
മണ്ണുകടത്തിന് ലോറിക്കാര്‍ കൊടുത്ത പണം കുറഞ്ഞുപോയെന്നാണ് എസ് ഐയുടെ പരാതി.ദൃശ്യങ്ങള്‍ പുറത്തുവന്നതോടെ എറണാകുളം ജില്ല പോലീസ് മേധാവി അന്വേഷണത്തിന് നിര്‍ദ്ദേശം നല്‍കി . സംഭവത്തെ കുറിച്ച് അന്വേഷണം ആരംഭിച്ചതായി റൂറല്‍ എസ്.പി വ്യക്തമാക്കി. റിപ്പോര്‍ട്ട് കിട്ടിയാല്‍ ഉടന്‍ നടപടി ഉണ്ടാകുമെന്നും റൂറല്‍ എസ്. പി അറിയിച്ചു. കഴിഞ്ഞ മാര്‍ച്ച് മാസത്തിലാണ് സംഭവമെന്നാണ് സൂചന. ആരോ അന്ന് എടുത്ത വീഡിയോ ഇപ്പോള്‍ പുറത്തു വിടുകയായിരുന്നു.
