ചൈനീസ് പുതുവത്സര ആഘോഷത്തിനിടെ വെടിവയ്പ്പ് ; അമേരിക്കയില്‍ 10 പേര്‍ കൊല്ലപ്പെട്ടു
കാലിഫോര്‍ണിയ : കാലിഫോര്‍ണിയയിലെ മോണ്ടെറി പാര്‍ക്കില്‍ ആണ് കൂട്ടക്കൊലപാതകം നടന്നത്. വെടിവയ്പ്പില്‍ 10 പേര്‍ കൊല്ലപ്പെട്ടു. നിരവധി പേര്‍ക്ക് പരുക്കേറ്റിട്ടുണ്ട്. ചൈനീസ് ലൂണാര്‍ ന്യൂ ഇയര്‍ ആഘോഷം നടക്കുന്ന സ്ഥലത്തിന് സമീപമായിരുന്നു ആക്രമണം. ശനിയാഴ്ച രാത്രി 10 മണിക്ക് ശേഷമാണ് ആക്രമണം ഉണ്ടായതെന്ന് ലോസ് ഏഞ്ചല്‍സ് ടൈംസ് റിപ്പോര്‍ട്ട് ചെയ്തു. പതിനായിരങ്ങള്‍ ഒത്തുകൂടിയ പുതുവത്സര പരിപാടിക്കിടെ അക്രമി യന്ത്രത്തോക്ക് ഉപയോഗിച്ച് വെടിയുതിര്‍ക്കുകയായിരുന്നു. പ്രതിയെ ഇതുവരെ കസ്റ്റഡിയിലെടുത്തിട്ടില്ലെന്നാണ് പ്രാഥമിക റിപ്പോര്‍ട്ടുകള്‍. ആക്രമണത്തിന് പിന്നിലെ കാരണം ഇതുവരെ അറിവായിട്ടില്ല. ലോസ് ഏഞ്ചല്‍സ് നഗരത്തില്‍ നിന്ന് 7 മൈല്‍ അകലെയുള്ള ലോസ് ഏഞ്ചല്‍സ് കൗണ്ടിയിലെ ഒരു നഗരമാണ് മോണ്ടേറി പാര്‍ക്ക്. അതേസമയം വെടിവെപ്പിനെക്കുറിച്ച് പൊലീസ് ഔദ്യോഗികമായി പ്രതികരിച്ചിട്ടില്ല.
