കൊച്ചിയില്‍ വാഹന പരിശോധനയ്ക്കിടെ എസ്.ഐ.യെ ബൈക്ക് ഇടിച്ചുതെറിപ്പിച്ചു
ഫോര്‍ട്ട് കൊച്ചി : വാഹന പരിശോധനയ്ക്കിടെ എസ്.ഐ.യെ ഇടിച്ചുതെറിപ്പിച്ച് ബൈക്ക് യാത്രികന്‍. ഇന്നലെ രാത്രി നടന്ന വാഹന പരിശോധനയ്ക്കിടെയാണ് സംഭവം. അപകടത്തില്‍ എസ്‌ഐ സന്തോഷ് മോന്‍ കെ.എമ്മിന് പരിക്കേറ്റു. ഇടിച്ചതിന് ശേഷം വാഹനം നിര്‍ത്താതെ പോകുകയായിരുന്നു. പൊലീസുകാര്‍ കൈ കാണിച്ചിട്ട് നിര്‍ത്താതെ പോയ ബൈക്കിനെ സന്തോഷ് കൈകാണിച്ച് നിര്‍ത്താന്‍ ശ്രമിക്കുന്നതിനിടെയാണ് ബൈക്ക് ഇടിച്ച് തെറിപ്പിച്ചത്. കൈക്ക് പൊട്ടലേറ്റ എസ്‌ഐ ചികിത്സതേടി.
അതേസമയം കൊച്ചി നഗരത്തില്‍ വീണ്ടും പൊലീസിന്റെ ‘ഓപ്പറേഷന്‍ കോമ്പിങ്’. ശനിയാഴ്ച രാത്രിയും ഞായറാഴ്ച പുലര്‍ച്ചെയുമായി നടത്തിയ പരിശോധനയില്‍ ആകെ 370 പേര്‍ക്കെതിരേ നടപടിയെടുത്തു. ഇതില്‍ 242 പേരും മദ്യപിച്ച് വാഹനമോടിച്ചതിനാണ് പിടിയിലായത്. ലഹരി ഉപയോഗവും മറ്റുമായി 26 പേരും പിടിയിലായി. കഴിഞ്ഞയാഴ്ചയും പൊലീസ് സമാനരീതിയില്‍ പരിശോധന നടത്തിയിരുന്നു. 310 പേര്‍ക്കെതിരേയാണ് കഴിഞ്ഞയാഴ്ച മദ്യപിച്ച് വാഹനമോടിച്ചതിന് കേസെടുത്തത്.
