മണിപ്പൂരില്‍ സണ്ണി ലിയോണ്‍ പങ്കെടുക്കേണ്ടിയിരുന്ന ഫാഷന്‍ ഷോ വേദിയ്ക്ക് സമീപം സ്‌ഫോടനം
പ്രമുഖ ബോളിവുഡ് നടി സണ്ണി ലിയോണ്‍ പങ്കെടുക്കേണ്ടിയിരുന്ന ഫാഷന്‍ ഷോ പരിപാടിയുടെ വേദിയ്ക്ക് സമീപം സ്‌ഫോടനം. മണിപ്പൂര്‍ തലസ്ഥാനമായ ഇംഫാലിലെ ഹട്ട കാംഗ്‌ജെയിബുഗില്‍ ഇന്ന് രാവിലെ 6.30നാണ് സ്‌ഫോടനം ഉണ്ടായത്. നാളെ നടി പങ്കെടുക്കുന്ന ഫാഷന്‍ ഷോ നടക്കേണ്ടിയിരുന്ന വേദിക്ക് തൊട്ടരികെയാണ് സ്‌ഫോടനം നടന്നത്. എന്നാല്‍ ആര്‍ക്കും പരിക്കേറ്റിട്ടില്ല എന്നാണ് വിവരങ്ങള്‍.
ഇംപ്രാവൈസ്ഡ് എക്‌സ്‌പ്ലോസീവി ഡിവൈസ് (ഐ ഇ ഡി) അല്ലെങ്കില്‍ ഗ്രനേഡ് പൊട്ടിത്തെറിച്ചാണ് സ്‌ഫോടനമുണ്ടായതെന്നാണ് നിഗമനം. പൊലീസും കേന്ദ്ര ഏജന്‍സികളും സ്ഥലത്ത് എത്തിയിട്ടുണ്ട്. സ്‌ഫോടനത്തെ തുടര്‍ന്ന നാളെ നടക്കാനിരുന്ന പരിപാടി റദ്ദാക്കി. സ്‌ഫോടനത്തിന് തൊട്ടുപിന്നാലെ പോലീസ് കമാന്‍ഡോകളുടെ സംഘം സ്ഥലത്ത് തിരച്ചില്‍ ആരംഭിച്ചു. മണിപ്പൂരിലെ ഹത്തയില്‍ കൈത്തറി, ഖാദി, ടൂറിസം എന്നിവ പ്രോത്സാഹിപ്പിക്കുന്നതിന്റെ ഭാഗമായാണ് പരിപാടി സംഘടിപ്പിച്ചിരുന്നത്.
