14 കാരിയെ കൂട്ടബലാത്സംഗം ചെയ്ത ശേഷം തേയില തോട്ടത്തില്‍ ഉപേക്ഷിച്ചു
അസമില്‍14 കാരിയെ കൂട്ടബലാത്സംഗം ചെയ്ത ശേഷം തേയില തോട്ടത്തില്‍ ഉപേക്ഷിച്ചു. കൈയ്യും, കാലും ബന്ധിച്ച നിലയില്‍ അബോധാവസ്ഥയില്‍ തോട്ടത്തില്‍ നിന്നും പെണ്‍കുട്ടിയെ കണ്ടെത്തുകയായിരുന്നു. ഫെബ്രുവരി മൂന്ന് മുതല്‍ പെണ്‍കുട്ടിയെ കാണാനില്ലായിരുന്നു. ശേഷം ഞായറാഴ്ച ഉച്ചകഴിഞ്ഞ് അബോധാവസ്ഥയില്‍ പെണ്‍കുട്ടിയെ കണ്ടെത്തുകയായിരുന്നു. പെണ്‍കുട്ടി കൂട്ടബലാത്സംഗത്തിന് ഇരയായെന്ന് സംശയിക്കുന്നതായി പൊലീസ് പറഞ്ഞു.
കേസുമായി ബന്ധപ്പെട്ട് രണ്ട് പേരുടെ അറസ്റ്റ് പൊലീസ് രേഖപ്പെടുത്തി. ഭൈജാന്‍ അലി, സഫര്‍ അലി എന്നിങ്ങനെ രണ്ട് പേരെയാണ് പൊലീസ് അറസ്റ്റ് ചെയ്തിരിക്കുന്നതെന്ന് ദിബ്രുഗഡ് എസ്പി ശ്വേതക് മിശ്ര മാധ്യമങ്ങളോട് പറഞ്ഞു.14 കാരിയായ പെണ്‍കുട്ടിയെ രണ്ട് പേര്‍ ചേര്‍ന്ന് ബലാത്സംഗം ചെയ്തുവെന്നാണ് പൊലീസ് സംശയിക്കുന്നത്. കൈയ്യും, കാലും കെട്ടിയ നിലയിലായിരുന്നു പെണ്‍കുട്ടിയെ കണ്ടെത്തിയത്. നിലവില്‍ പെണ്‍കുട്ടിയെ പരിശോധനയ്ക്കും, ചികിത്സയ്ക്കുമായി അസം മെഡിക്കല്‍ ആശുപത്രിയിലേക്ക് മാറ്റിയിരിക്കുകയാണ്.
ഭൈജാന്‍ അലി എന്നയാള്‍ ഫെബ്രുവരി മൂന്നിന് പെണ്‍കുട്ടിയെ തട്ടിക്കൊണ്ട് പോയി രണ്ട് ദിവസം തേയില തോട്ടത്തില്‍ വെച്ച് കൂട്ടബലാത്സംഗം ചെയ്തുവെന്നാണ് പൊലീസിന് ലഭിച്ച വിവരം. ഭൈജാന്‍ അലി തന്റെ മകളെ തട്ടികൊണ്ട് പോയി എന്ന് സംശയിക്കുന്നതായി പെണ്‍കുട്ടിയുടെ അമ്മ തന്നെയാണ് പൊലീസിനെ അറിയിച്ചത്. തുടര്‍ന്ന് നടത്തിയ അന്വേഷണത്തനൊടുവിലാണ് അലിയടക്കം രണ്ട് പേരെ പൊലീസ് അറസ്റ്റ് ചെയ്തത്. പോക്‌സോ കേസ് അടക്കം ചുമത്തിയാണ് രണ്ട് പേരെയും പൊലീസ് അറസ്റ്റ് ചെയ്തത്. അന്വേഷണം തുടരുകയാണെന്നും പൊലീസ് അറിയിച്ചു.
