വാട്ട്സ് ആപ്പില്‍ പുതിയ ഫീച്ചറുകള്‍
പണ്ടത്തെ പോലെയല്ല വാട്ട്സ് ആപ്പില്‍ ഇപ്പോള്‍ ഇടയ്ക്കിടയ്ക്ക് പുതിയ മാറ്റങ്ങള്‍ വരുന്നുണ്ട്. ഒരു നിശ്ചിത സമയത്ത് പുതിയ ഫീച്ചറുകള്‍ അവതരിപ്പിക്കുക ഇപ്പോള്‍ ഒരു പതിവായി കഴിഞ്ഞു.അത്തരത്തില്‍ നമ്മള്‍ ഇടുന്ന സ്റ്റേറ്റസ് അപ്ഡേറ്റുകള്‍ കൂടുതല്‍ സുരക്ഷിതമാക്കാനും കസ്റ്റമൈസ് ചെയ്യാനുമാണ് പുതിയ മാറ്റങ്ങള്‍ വാട്ട്സ് ആപ്പില്‍ വരുത്തിയിരിക്കുന്നത്. വോയ്സ് മെസേജ്, സ്റ്റേറ്റസ് റിയാക്ഷന്‍, സ്റ്റേറ്റസ് പ്രൊഫൈല്‍ റിംഗ് , ലിങ്ക് പ്രിവ്യു എന്നിവയാണ് അവതരിപ്പിച്ചിരിക്കുന്ന പുതിയ ഫീച്ചറുകള്‍. ഇനിമുതല്‍ ഇന്‍സ്റ്റഗ്രാം സ്റ്റോറി പ്രവര്‍ത്തിക്കുന്ന അതേ മാതൃകയിലാകും വാട്ട്സ് ആപ്പ് സ്റ്റേറ്റസുകളും പ്രവര്‍ത്തിക്കുക.
വാട്ട്സ് ആപ്പ് കോളും മെസേജും പോലെ സ്റ്റേറ്റസുകളും എന്‍ഡ് -ടു-എന്‍ഡ് എന്‍ക്രിപ്റ്റഡായിരിക്കും. വാട്ട്സ് ആപ്പില്‍ ഇനി മുതല്‍ ചിത്രങ്ങളും വിഡിയോയും കൂടാതെ വോയ്സ് സ്റ്റേറ്റസും ഇടാന്‍ സാധിക്കും. ചിത്രം അല്ലാതെ കോണ്‍ട്കാട്സിലുള്ളവരോട് എന്തെങ്കിലും പറയാന്‍ ആഗ്രഹിക്കുന്നുണ്ടെങ്കില്‍ വോയ്സ് സ്റ്റേറ്റസ് ഫീച്ചര്‍ ഉപകാരപ്രദമായിരിക്കും. ഈ സ്റ്റേറ്റസുകള്‍ക്ക് പല ഇമോജികള്‍ കൊണ്ട് റിയാക്ട് ചെയ്യാനും സാധിക്കും. ഒരു വ്യക്തി സ്റ്റാറ്റസ് ഇട്ടിട്ടുണ്ടെന്ന് സൂചിപ്പിക്കാനായി പ്രൊഫൈലിന് ചുറ്റും പച്ച നിറത്തിലുള്ള റിംഗും കാണാന്‍ കഴിയും.
