കൃഷി പഠിക്കാന്‍ പോയി ഇസ്രായേലില്‍ മുങ്ങിയ കണ്ണൂര്‍ സ്വദേശിയെ കണ്ടെത്തി
കൃഷി വകുപ്പ് സംഘത്തിനൊപ്പം കേരളത്തില്‍ നിന്ന് ഇസ്രായേലില്‍ പോയി കാണാതായ ബിജു കുര്യന്‍ മുങ്ങിയതാണ് എന്ന് വ്യക്തമായി.ഇയാള്‍ കഴിഞ്ഞ ദിവസം കുടുംബവുമായി ഫോണില്‍ ബന്ധപ്പെട്ടു . സുരക്ഷിതനാണെന്നും തന്നെ അന്വേഷിക്കണ്ടെന്നും ബിജു ഭാര്യയോട് പറഞ്ഞു . ഇപ്പോള്‍ ബിജുവുമായി ബന്ധപ്പെടാന്‍ കഴിയുന്നില്ലെന്നും സഹോദരന്‍ ബെന്നി പറഞ്ഞു. കണ്ണൂര്‍ ഇരിട്ടി സ്വദേശി സ്വദേശിയാണ് ബിജു കുര്യന്‍ (48) . ബിജുവിന് അപകടം ഒന്നും സംഭവിച്ചിട്ടില്ലെന്നാണ് വിവരമെന്ന് കൃഷി മന്ത്രി പ്രതികരിച്ചു.
എംബസിയിലും പൊലീസിലും പരാതി നല്‍കിയിട്ടുണ്ടെന്നും മന്ത്രി പി.പ്രസാദ് പറഞ്ഞു. ബിജു കുര്യന്‍ അടക്കം 27 കര്‍ഷകരും കൃഷി വകുപ്പ് പ്രിന്‍സിപ്പല്‍ സെക്രട്ടറി ബി.അശോകുമാണ് ഈ മാസം 12 ന് ഇസ്രായേലിലേക്ക് പോയത്. വെള്ളിയാഴ്ച രാത്രി മുതലാണ് ബിജു കുര്യനെ കാണാതായത്. എംബസിയിലും ഇസ്രായേല്‍ പൊലീസിലും പ്രിന്‍സിപ്പല്‍ സെക്രട്ടറി ബി.അശോക് പരാതി നല്‍കി. അതിനുശേഷം സംഘം നാട്ടിലേക്ക് തിരിക്കുകയായിരുന്നു.
