രണ്ടു ദിവസം കഴിഞ്ഞിട്ടും അണയാതെ ബ്രഹ്മപുരത്തെ തീ ; പ്രദേശവാസികള്‍ വീടുകളില്‍ കഴിയണമെന്ന് കളക്ടര്‍
ദിവസം രണ്ടു കഴിഞ്ഞിട്ടും കൊച്ചി ബ്രഹ്മപുരം മാലിന്യ പ്ലാന്റിലെ തീ ആളി കത്തുകയാണ്.ടണ്‍ കണക്കിനുള്ള പ്ലാസ്റ്റിക് മാലിന്യത്തിലെ തീ കെടാത്തതാണ് പ്രതിസന്ധി രൂക്ഷമാകുന്നത്. തീപ്പടര്‍ന്ന് 48 മണിക്കൂറ് പിന്നിടുന്‌പോഴും ബ്രഹ്മപുരത്തെ മാലിന്യമലയില്‍ പുക ഉയരുകയാണ്.ഒരു ഭാഗത്ത് തീ കെടുത്തുന്‌പോഴും പ്ലാസ്റ്റിക് മാലിന്യത്തിലെ കനലുകള്‍ വീണ്ടും പടരുന്നു. വെല്ലുവിളികള്‍ തുടരുന്‌പോള്‍ കൂടിയാലോചനയ്ക്ക് ശേഷമാണ് ജില്ല ഭരണകൂടം പുതിയ ആക്ഷന്‍ പ്ലാന്‍ തയ്യാറാക്കുന്നത്.ബിപിസിഎല്ലിനൊപ്പം കൊച്ചിയിലെ പൊതുമേഖല സ്ഥാപനങ്ങളുടെ ഫയര്‍ എഞ്ചിനുകളടക്കം ബ്രഹ്മപുരത്തേക്ക് എത്തി. എയര്‍ ഫോഴ്‌സ്,നേവി യൂണിറ്റുകളുടെ സഹായം തേടാന്‍ ആദ്യം ആലോചിച്ചെങ്കിലും ആ തീരുമാനം തത്കാലത്തേക്ക് പിന്‍വലിച്ചു.
നാളെ യുദ്ധകാലടിസ്ഥാനത്തില്‍ തീകെടുത്താനുള്ള ശ്രമങ്ങളാണ് നടക്കുന്നത്. ഞായറാഴ്ച ആയതിനാല്‍ ബ്രഹ്മപുരം പരിസരത്തും പുക വ്യാപകമായി പ്രശ്‌നങ്ങള്‍ ഉണ്ടാക്കുന്ന സ്ഥലങ്ങളിലും മുന്‍കരുതല്‍ വേണനെന്ന് ജില്ല ഭരണകൂടം അറിയിച്ചു. ഈ മേഖലയില്‍ പരമാവധി കടകള്‍ അടച്ചിടാന്‍ ശ്രമിക്കണം കൂടുതല്‍ പുക ഉയരാനുള്ള സാഹചര്യം മുന്നില്‍കണ്ട് വീടുകളില്‍ തന്നെ തുടരുന്നതാകും ഉചിതമെന്നാണ് പൊതുനിര്‍ദ്ദേശം.ബ്രഹ്മപുരത്തെ തീപിടുത്തം കമ്മീഷണര്‍ അന്വേഷണിക്കണമെന്ന് ഇന്ന് ചേര്‍ന്ന യോഗത്തില്‍ ചീഫ് സെക്രട്ടറി നിര്‍ദ്ദേശം നല്‍കിയിട്ടുണ്ട്. ബ്രഹ്മപുരത്തേക്ക് മാലിന്യവണ്ടികള്‍ കയറ്റാനാകാത്തതിനാല്‍ നഗരത്തിലെ വീടുകളിലും ഫ്‌ലാറ്റുകളിലും നിന്ന് മാലിന്യം ശേഖരിക്കുന്നത് നിര്‍ത്തി. മാലിന്യ നിക്ഷേപത്തിന് പകരം സ്ഥലങ്ങള്‍ കണ്ടെത്തി നാളെ മാലിന്യം നീക്കം തുടങ്ങാനും ശ്രമങ്ങള്‍ തുടങ്ങിയിട്ടുണ്ട്.
ബ്രഹ്മപുരത്തെ തീയണയ്ക്കാന്‍ പുഴയില്‍ നിന്നും വെള്ളമെത്തിക്കാന്‍ ശ്രമിക്കുന്നതായി എറണാകുളം ജില്ലാ കളക്ടര്‍ രേണുരാജ്. ഇതിനായി പ്രളയസമയത്ത് ഉപയോഗിച്ച മോട്ടറുകള്‍ ആലപ്പുഴയില്‍ നിന്നടക്കം ലഭ്യമാക്കും. നിലവില്‍ ഇരുപത് അഗ്‌നിരക്ഷാ എഞ്ചിനുകള്‍ തീയണയ്ക്കാനുള്ള ദൗത്യത്തില്‍ പങ്കെടുക്കുന്നുണ്ടെന്നും കളക്ടര്‍ അറിയിച്ചു. അപകടസാധ്യത കണക്കിലെടുത്ത് ബ്രഹ്മപുരം പരിസരത്ത് നാളെ കഴിവതും ജനങ്ങള്‍ പുറത്തിറങ്ങാതെ വീടുകളില്‍ തന്നെ കഴിയണമെന്നും അവധി ദിനമായതിനാല്‍ പരമാവധി സഹകരിക്കണമെന്നും കളക്ടര്‍ അഭ്യര്‍ത്ഥിച്ചു. ആവശ്യപ്പെട്ടാല്‍ മൂന്ന് മണിക്കൂറില്‍ രക്ഷാപ്രവര്‍ത്തനം നടത്താന്‍ തയ്യാറാണെന്ന് കോയമ്പത്തൂരിലെ വ്യോമസേന യൂണിറ്റ് അറിയിച്ചിട്ടുണ്ടെന്നും കളക്ടര്‍ പറഞ്ഞു.
പ്ലാസ്റ്റിക് മാലിന്യത്തിലെ കനലുകള്‍ കെടാത്തതാണ് പ്രതിസന്ധി. അഗ്‌നിരക്ഷ സേനയ്‌ക്കൊപ്പം നാവിക സേനയുടെയും ബിപിസിഎല്ലിന്റെയും ചേര്‍ത്ത് 25 യൂണിറ്റുകള്‍ തീ അണയ്ക്കാന്‍ ബ്രഹ്മപുരത്തുണ്ട്. ഒപ്പം നാവിക സേന ALH, സീ കിംഗ് ഹെലികോപ്റ്ററുകളിലെത്തി വെള്ളം തളിയ്ക്കുന്നു. 600 ലിറ്റര്‍ വെള്ളമാണ് ഒറ്റത്തവണ ആകാശത്ത് നിന്നൊഴിക്കുന്നത്. ഇന്നലെ പകല്‍ കെടുത്തിയ തീ രാത്രി മാലിന്യകൂമ്പാരത്തില്‍ വീണ്ടും ആളിപ്പടര്‍ന്നു. ഇതോടെ ബ്രഹ്മപുരത്ത് നിന്നുള്ള പുക രാവിലെ കൊച്ചി നഗരത്തിലെ വൈറ്റില മുതല്‍ തേവര വരെയുള്ള മേഖലകളിലേക്ക് എത്തിയിരുന്നു. അഗ്‌നിബാധയെ തുടര്‍ന്ന് കൊച്ചിനഗരത്തിലെ മാലിന്യ നീക്കവും തടസ്സപ്പെട്ടിരിക്കുകയാണ്.
